Ghazal

yaad aa gayaa vo shakhs to yaad aae jaaegaa

rulvaae jaaegaa hamein taDpaae jaaegaa

taa'bir se kabhi to navaazegaa aasmaan

kab tak hamaare khvaab-mahal Dhaae jaaegaa

· · ·

rahi raat un se mulaaqaat kam

mudaaraat khaasi hui baat kam

tiri yaad itnaa baDaa kaam hai

ki maalum hote hain din raat kam

· · ·

mere siine mein kuchh zer-o-zabar hai

chaman mein ghaaliban vaqt-e-sahar hai

chalaa jaataa huun aksar shahr vaalo

bayaabaan mein bhi meraa ek ghar hai

· · ·

aise dekhaa hai ki dekhaa hi na ho

jaise mujh ko tiri parvaa hi na ho

baaz ghar shahr mein aise dekhe

jaise un mein koi rahtaa hi na ho

· · ·

ittifaaq apni jagah khush-qismati apni jagah

khud banaataa hai jahaan mein aadmi apni jagah

kah to saktaa huun magar majbur kar saktaa nahin

ikhtiyaar apni jagah hai bebasi apni jagah

· · ·

vo bhi kyaa daur zindagi kaa thaa

koi meraa thaa main kisi kaa thaa

aankh kyaa aaftaab par jamti

masala tez raushni kaa thaa

· · ·

divaar jaane dijiye dar jaane dijiye

dasht-o-daman basaaiye ghar jaane dijiye

har phuul dekhne ke liye hai bahaar kaa

jis jis pe jaa rahi hai nazar jaane dijiye

· · ·

ham us ke sahi vo hamaaraa nahin

mohabbat pe koi ijaara nahin

main fitrat ki ik khaam tasvir huun

kisi ne banaayaa sanvaaraa nahin

· · ·

un ki surat hamein aai thi pasand aankhon se

aur phir ho gai baalaa-o-buland aankhon se

koi zanjir nahin taar-e-nazar se mazbut

ham ne is chaand pe Daali hai kamand aankhon se

· · ·

kuchh dinon apne ghar rahaa huun main

aur phir dar-ba-dar rahaa huun main

dusron ki khabar to kyaa letaa

khud se bhi be-khabar rahaa huun main

· · ·

dhoka karein fareb karein yaa daghaa karein

ham kaash dusron pe na tohmat dharaa karein

rakkhaa karein har ek khataa apne dosh par

har jurm apni fard-e-‘amal mein likhaa karein

· · ·

mujhe ye justuju kyuun ho ki kyaa huun aur kiyaa thaa main

koi apne sivaa huun main koi apne sivaa thaa main

na jaane kaun saa aatish-fishaan thaa mere siine mein

ki khaali thaa bahut phir bhi dhamak kar phaT paDaa thaa main

· · ·

ham use kaash ru-baru karte

aur aankhon se guftugu karte

dosto mere saath ye neki

tum na karte to kyaa 'adu karte

· · ·

bayaabaan huun yaa samundar huun main

vahi saamne huun jo andar huun main

khudaaraa na khulvaao meri zabaan

shikaayaat kaa ek daftar huun main

· · ·

saamne aa kar vo kyaa rahne lagaa

ghar kaa darvaaza khulaa rahne lagaa

paas rahne se to apne darmiyaan

jaise koi faasla rahne lagaa

· · ·

puuri sazaa-e-zindagi karne ke baa'd hi

ab ham rihaai paaeinge marne ke baa'd hi

aaraam se raho ki taDapte raho miyaan

aati hai subh raat guzarne ke baa'd hi

· · ·

sar gharibon ke kham ziyaada hain

is liye un ke gham ziyaada hain

jaane vo zulf hai bahut pur-pech

yaa giraftaar ham ziyaada hain

· · ·

balaa se garebaan hai yaa nahin

uTho jism mein jaan hai yaa nahin

mohabbat mein aakhir ye kyaa sochnaa

vo kaafir musalmaan hai yaa nahin

· · ·

tanhaai pasandida hai mahfil se ziyaada

duniyaa mein koi dost kahaan dil se ziyaada

har chiiz mayassar hui lekin na mile aap

laa-haasili-e-'umr hai haasil se ziyaada

· · ·

raabta subh-o-shaam hai ham se

kyaa unhein koi kaam hai ham se

tauba ne haath baandh rakkhe hain

varna kyaa duur jaam hai ham se

· · ·

us bazm mein kyaa koi sune raae hamaari

ye baat ye auqaat kahaan haae hamaari

ham chaahte kyaa hain nahin maa'lum kisi ko

kis tarh tabi'at koi bahlaae hamaari

· · ·

log saae dikhaai dete hain

phir bhi haae dikhaai dete hain

bolte kuchh nahin magar mazlum

tilmilaae dikhaai dete hain

· · ·

aasaaniyon ki raah khuli mushkilon ke baa'd

ghar lauTnaa nasib huaa gardishon ke baa'd

aise hi naa-umid nahin ho gae hain ham

aayaa hai ye maqaam bahut koshishon ke baa'd

· · ·

tum guzre the kis jaldi se

dekh rahaa thaa main khiDki se

main imaan nahin bechungaa

roTi khaa lungaa chaTni se

· · ·