Ghazal

raat ki nindein to pahle hi uDaa kar le gayaa

rah gai thi aarzu so vo bhi aa kar le gayaa

din nikalte hi vo khvaabon ke jazire kyaa hue

subh kaa suraj miri aankhein churaa kar le gayaa

· · ·

dil bahut masruf thaa kal aaj be-kaaron mein hai

saat pardon mein jo rahtaa thaa vo baazaaron mein hai

khaak ke putle falak ki sarhadon ko chhu chuke

aur jise insaan kahte hain abhi ghaaron mein hai

· · ·

sukun kuchh to milaa dil kaa maajraa likh kar

lifaafa phaaD diyaa phir tiraa pata likh kar

samajh mein ye nahin aataa khitaab kaise karun

huruf kaaT diye main ne baar-haa likh kar

· · ·

khile jo phuul to munh chhup gayaa sitaaron kaa

misaal-e-abr chalaa kaarvaan bahaaron kaa

na mujh se puchh shab-e-hijr dil pe kyaa guzri

ye dekh haal hai kyaa mere gham-gusaaron kaa

· · ·

chamak chamak ke sitaaro mujhe fareb na do

tum apni raat guzaaro mujhe fareb na do

tilism TuuT gayaa hai tumhaari ulfat kaa

miri havas ko pukaaro mujhe fareb na do

· · ·

dil kaa buraa nahin magar shakhs ajiib Dhab kaa hai

mujh se hai khaas dushmani vaise to yaar sab kaa hai

duriyon ne miTaa diye jo bhi the qurbaton ke ranj

ab miri baat baat mein rang tiri talab kaa hai

· · ·

is bhare shahr mein aaraam main kaise paaun

jaagte chikhte rangon ko kahaan le jaaun

pairahan chust havaa sust khaDi divaarein

use chaahun use rokun ki judaa ho jaaun

· · ·

tujh pe jaan dene ko tayyaar koi to hogaa

zindagi teraa talabgaar koi to hogaa

takhta-e-daar pe chaahe jise laTkaa diije

itne logon mein gunahgaar koi to hogaa

· · ·

aaj tak us ki mohabbat kaa nasha taari hai

phuul baaqi nahin khushbu kaa safar jaari hai

sehr lagtaa hai pasine mein nahaayaa huaa jism

ye 'ajab niind mein Duubi hui bedaari hai

· · ·

hijr ki raat miri jaan pe bani ho jaise

dil mein ik yaad ki neze ki ani ho jaise

nahin maalum ki main kaun huun manzil hai kahaan

chaadar-e-khaak har ik samt tani ho jaise

· · ·

tiri talaash to kyaa teri aas bhi na rahe

ajab nahin ki kisi din ye pyaas bhi na rahe

har ek samt khalaa hi khalaa nazar aaein

kharaaba-e-dil-e-viraan mein yaas bhi na rahe

· · ·

kitni be-nur thi din bhar nazar-e-parvaana

raat aai to hui hai sahar-e-parvaana

shama jalte hi yahaan hashr kaa manzar hogaa

phir koi paa na sakegaa khabar-e-parvaana

· · ·

ishq vahshi hai jahaan dekhegaa

husn ko siine se lipTaa legaa

gham agar saath na teraa degaa

phir tujhe koi nahin puchhegaa

· · ·

jaane kis samt se havaa aai

baar baar apni hi sadaa aai

husn bhi hech saamne jis ke

mere hisse mein vo balaa aai

· · ·

ye soch kar ki teri jabin par na bal paDe

bas duur hi se dekh liyaa aur chal paDe

dil mein phir ik kasak si uThi muddaton ke baad

ik umr ke ruke hue aansu nikal paDe

· · ·

main jo rotaa huun to kahte ho ki aisaa na karo

tum agar meri jagah ho to bhalaa kyaa na karo

ab to ai dil havas-e-saaghar-o-minaa na karo

chhoD bhi do ye taqaazaa ye taqaazaa na karo

· · ·

fasl-e-gul khaak hui jab to sadaa di tu ne

ai gul-e-taaza bahut der lagaa di tu ne

teri khushbu se mire dil mein khile dard ke phuul

so gai thi jo balaa phir se jagaa di tu ne

· · ·

ye na ho vo bhulne vaalaa bhulaa denaa paDe

aur phir ye raaz us ko bhi bataa denaa paDe

ai dil-e-hangaama-khu takraar itni bhi na kar

tang aa kar tujh ko mahfil se uThaa denaa paDe

· · ·

ham logon ko apne dil ke raaz bataate rahte hain

log hamaari baatein sun kar hanste hansaate rahte hain

jin lamhon ne luuT liyaa thaa mere dil ki duniyaa ko

aksar meri mahfil-e-gham mein aate jaate rahte hain

· · ·

dil o nazar pe tire baad kyaa nahin guzraa

tujhe gumaan ki koi haadsa nahin guzraa

vahaan vahaan bhi mujhe le gayaa hai shauq-e-safar

kabhi jahaan se koi qaafila nahin guzraa

· · ·

muntazir dasht-e-dil-o-jaan hai ki aahu aae

saare manzar hi badal jaaein agar tu aae

niind aae to achaanak tiri aahaT sun luun

jaag uTThun to badan se tiri khushbu aae

· · ·

vo jaa chukaa hai to kyuun be-qaraar itne ho

mohabbat us se karo jis ko bhuul sakte ho

nishaan-e-manzil-e-jaan gar nahin milaa na sahi

chalo safar to kiyaa hai kahin to pahunche ho

· · ·

ab na vo shor na vo shor machaane vaale

khaak se baiTh gae khaak uDaane vaale

ye alag baat mayassar lab-e-goyaa na huaa

dil mein vo dhuum ki sunte hain zamaane vaale

· · ·

kaise guzar sakeinge zamaane bahaar ke

chup ho gayaa huun mausam-e-gul ko pukaar ke

yaa meri zindagi mein ujaalaa kare koi

yaa pheink de kahin ye sitaare utaar ke

· · ·