Ghazal

jab vo nazrein do-chaar hoti hain

tiir si dil ke paar hoti hain

ranjishein meri aur us gul ki

raat din mein hazaar hoti hain

· · ·

mere gale se aan ke pyaaraa jo phir lage

ye abr ye bahaar mujhe khub-tar lage

bin dekhe us pyaare ke aankhon ne apnaa haal

aisaa kiyaa hai jaise ki baaraan kaa jhaD lage

· · ·

kal kaa vaada na karo dil miraa bekal na karo

kal paDegi na mujhe mujh se ye kal kal na karo

kahin jalaa de na use shola-e-aah-e-aashiq

palkon ki TaTTi ke taiin aankhon ki ojhal na karo

· · ·

ghar ghair ke jo yaar miraa raat se gayaa

ji siine se nikal gayaa dil haat se gayaa

main jaan se gayaa tiri khaatir va-lek haif

tu mujh se zaahiri bhi mudaaraat se gayaa

· · ·

paataa nahin huun aur kisi kaam se lazzat

jo kuchh ki main paataa huun tire naam se lazzat

kaifiyatein is dida-e-maigun se jo paain

paai na kabhi baade se aur jaam se lazzat

· · ·

dekho to kis adaa se rukh par hain Daali zulfein

juun maar Dasti hain dil dilbar ki kaali zulfein

chaahe hain jis na tis ko baandhein girah mein apni

dil lene ko balaa hain ye pech vaali zulfein

· · ·

go sudh nahin us shokh sitamgar ne sambhaali

tis par bhi koi baat adaa se nahin khaali

kuchh hosh nahin mujh mein rahaa jab se pilaai

us nargis-e-makhmur ki saaqi ne pyaali

· · ·