Ghazal

miri hi baat sunti hai mujhi se baat karti hai

kahaan tanhaai ghar ki ab kisi se baat karti hai

hamesha us ki baaton mein andheron kaa vahi ronaa

ye shab jab bhi diye ki raushni se baat karti hai

· · ·

kabhi sukun kabhi sabr-o-qaraar TuTegaa

agar ye dil hai to phir baar baar TuTegaa

vo apne zarf se baDh kar bharaa huaa baadal

ye dekhnaa kahin be-ikhtiyaar TuTegaa

· · ·

mustaqil rone se dil ki be-kali baDh jaaegi

baarishein hoti rahin to ye nadi baDh jaaegi

ishq ki raahon mein haael ho rahi hai aagahi

ab junun baDh jaaegaa divaangi baDh jaaegi

· · ·

samundaron ko bhi dariyaa samajh rahe hain ham

ye apne-aap ko ab kyaa samajh rahe hain ham

hamaari raah mein haael jo ik andheraa hai

use bhi apnaa hi saaya samajh rahe hain ham

· · ·

kab talak chalnaa hai yuun hi ham-safar se baat kar

manzilein kab tak mileingi rahguzar se baat kar

tujh ko mil jaaegaa tere sab savaalon kaa javaab

kashtiyaan kyuun Duub jaati hain bhanvar se baat kar

· · ·

ishq kaa rog to virse mein milaa thaa mujh ko

dil dhaDaktaa huaa siine mein milaa thaa mujh ko

haan ye kaafir usi hujre mein milaa thaa mujh ko

ek momin jahaan sajde mein milaa thaa mujh ko

· · ·

har ek raat mein apnaa hisaab kar ke mujhe

sahar ko chhoD diyaa aaftaab kar ke mujhe

mire junun ko pahunchaa diyaa hai manzil tak

safar ke shauq ne khaana-kharaab kar ke mujhe

· · ·

main kyaa bataaun kaisi pareshaaniyon mein huun

kaaghaz ki ek naav huun aur paaniyon mein huun

chehre ke khadd-o-khaal mein mahdud main nahin

ik aaina huun apni hi hairaaniyon mein huun

· · ·

sachchaaiyon ko bar-sar-e-paikaar chhoD kar

ham aa gae hain dasht mein ghar-baar chhoD kar

aankhon mein jaagte hue khvaabon kaa kyaa karein

nindein chali gaiin hamein bedaar chhoD kar

· · ·

laakh Takraate phirein ham sar dar-o-divaar se

ji ki bhartaa hi nahin hai lazzat-e-aazaar se

kuchh to ghar vaalon ne ham ko kar diyaa maazur saa

aur kuchh ham fitratan uktaa gae ghar-baar se

· · ·

kuchh na kuchh silsila hi ban jaataa

ret par naqsh-e-paa hi ban jaataa

kis ne kaaghaz pe likh diyaa mujh ko

is se behtar sadaa hi ban jaataa

· · ·

sab ne honTon se lagaa kar toD Daalaa hai mujhe

kuza-gar ne jaane kis miTTi se Dhaalaa hai mujhe

is tarah to aur manzar ki udaasi baDh gai

main kahin khud mein nihaan thaa kyuun nikaalaa hai mujhe

· · ·

sisakte baam-o-dar rotaa huaa ghar chhoD aayaa huun

main khud ko ek viraane mein jaa kar chhoD aayaa huun

jahaan ehsaas ki aavaaz bhi aati nahin mujh tak

main aisi be-hisi mein khud ko aksar chhoD aayaa huun

· · ·

kab tak gardish mein rahnaa hai kuchh to bataa ayyaam mujhe

kashti ko saahil mil jaataa aur thoDaa aaraam mujhe

dasht nahin hai ye to meraa ghar hai lekin jaane kyuun

uljhaae rahti hai ik vahshat si subh-o-shaam mujhe

· · ·

justuju meri kahin thi aur main bhaTkaa kahin

mil gai manzil mujhe to kho gayaa rastaa kahin

puchhtaa rahtaa huun khud se kyaa use dekhaa kahin

aaine ke zaaviyon mein kho gayaa chehra kahin

· · ·

khvaahish-e-parvaaz hai to baal-o-par bhi chaahiye

main musaafir huun mujhe rakht-e-safar bhi chaahiye

is qadar bhi ranj kaa khugar nahin huun main abhi

raaste mein dhuup ho to ik shajar bhi chaahiye

· · ·

main ne sochaa thaa mujhe mismaar kar saktaa nahin

'aks to mujh par palaT kar vaar kar saktaa nahin

aaina zaahir to kar saktaa hai khadd-o-khaal ko

aaina ehsaas kaa izhaar kar saktaa nahin

· · ·

phir vo be-samt uDaanon ki kahaani sun kar

so gayaa peD parindon ki kahaani sun kar

kyaa yahi khvaab ki taa'bir huaa karti hai

uD gai niind bhi aankhon ki kahaani sun kar

· · ·

paraayaa lag rahaa thaa jo vahi apnaa nikal aayaa

miraa ik ajnabi se duur kaa rishta nikal aayaa

abhi tak to tiri yaadein miri miraas thiin lekin

tasavvur mein kahaan se ik nayaa chehra nikal aayaa

· · ·

khvaab jiine nahin deinge tujhe khvaabon se nikal

vaqt barbaad na kar raaegaan sochon se nikal

dasht-e-imkaan mein dariyaa bhi hai baadal bhi hain

shart bas itni hai tu apne saraabon se nikal

· · ·

chaahaton ke khvaab ki taabir thi bilkul alag

aur jiinaa paD rahi hai zindagi bilkul alag

vo alag ehsaas thaa jab kashtiyaan maujon mein thiin

lag rahi hai ab kinaare se nadi bilkul alag

· · ·

rishton ke jab taar ulajhne lagte hain

aapas mein ghar-baar ulajhne lagte hain

maazi ki aankhon mein jhaank ke dekhun to

kuchh chehre har baar ulajhne lagte hain

· · ·

aab ki taasir mein huun pyaas ki shiddat mein huun

abr kaa saaya huun lekin dasht ki vusat mein huun

yuun to apnaa lag rahaa hai jism kaa ye ghar mujhe

ruuh lekin kah rahi hai dekh main ghurbat mein huun

· · ·

khud par jo e'timaad thaa jhuTaa nikal gayaa

dariyaa mire qayaas se gahraa nikal gayaa

shaayad bataa diyaa thaa kisi ne miraa pata

milon miri talaash mein rasta nikal gayaa

· · ·