Ghazal

be-taalluq saare rishte kaun kis kaa aashnaa

saath saae ki tarah sab aur sab naa-aashnaa

karb jaari hai bajaae khuun ragon mein saahibo

kaun hai ham saa jahaan mein gham se itnaa aashnaa

· · ·

jiinaa hai khuub auron ki khaatir jiyaa karo

ik-aadh saans khud bhi to lete rahaa karo

kyaa harj hai jo dil ki bhi sun lo kabhi kabhi

yuun apne aap se na hamesha laDaa karo

· · ·

divaar-o-dar mein simTaa ik lams kaanptaa hai

bhule se koi dastak de kar chalaa gayaa hai

sabr o shakeb baaqi taab o tavaan salaamat

dil misl-e-ud jal jal khushbu bikhertaa hai

· · ·

aisaa hone nahin detaa thaa magar hone ko hai

zindagi ab to na jiine mein basar hone ko hai

par jo kaaTe gae jaa phaile havaaon mein tamaam

apni parvaaz ba-andaaz-e-digar hone ko hai

· · ·

paabandiyon se apni nikalte vo paa na the

sab raaste khule the magar ham pe vaa na the

ye aur baat shauq se ham ko sunaa gayaa

phir bhi vahi sunaayaa sunaa ik fasaana the

· · ·

badan pe zakhm sajaae lahu labaada kiyaa

har ek sang se yuun ham ne istifaada kiyaa

hai yuun ki kuchh to baghaavat-sirisht ham bhi hain

sitam bhi us ne zarurat se kuchh ziyaada kiyaa

· · ·

miri hatheli mein likkhaa huaa dikhaai de

vo shakhs mujh ko ba-rang-e-hinaa dikhaai de

use jo dekhun to apnaa suraagh paaun main

isi ke naam mein apnaa pataa dikhaai de

· · ·

koi aahaT koi sargoshi sadaa kuchh bhi nahin

ghar mein ik behis khamoshi ke sivaa kuchh bhi nahin

naam ik naayaab saa likkhaa thaa vo bhi miT gayaa

ab hatheli par lakiron ke sivaa kuchh bhi nahin

· · ·

kab ik maqaam pe rukti hai sar-phiri hai havaa

tamaam shahr o bayaabaan ko chhaanti hai havaa

nasib-e-paa-e-junun hai sadaa ki dar-badri

havaa-e-jaada-o-manzil mein kab chali hai havaa

· · ·

daamaan-e-aarzu ke kinaare sameTte

miltaa hai kab kisi ko vo sab kuchh jo chaahiye

hote hain kuchh sharar bhi chhupe raakh mein kahin

hai dekhne mein sard sambhal kar kurediye

· · ·

hamaari jaagti aankhon mein khvaab saa kyaa thaa

ghaneri shab mein ugaa aaftaab saa kyaa thaa

kahin hui to thi halchal kahin pe gahre mein

bigaD bigaD ke vo bantaa habaab saa kyaa thaa

· · ·

zakhm ko phuul kahein nauhe ko naghma samjhein

itne saada bhi nahin ham ki na itnaa samjhein

zakhm kaa apne mudaavaa kise manzur nahin

haan magar kyuun kisi qaatil ko masihaa samjhein

· · ·

apni to koi baat banaae nahin bani

kuchh ham na kah sake to kuchh us ne nahin suni

yuun to chahaar samt hai apne hisaar-e-shab

ham tirgi ko chhed ke laate hain raushni

· · ·

jaane kyaa kuchh hai aaj hone ko

ji miraa chaahtaa hai rone ko

ek umr aur haath kyaa aayaa

zindagi kyaa mili thi khone ko

· · ·

fusun-zada hain havaaein manzar tamaam mashur chup paDe hain

siyaah nairang nim-shab kaa sitaare jhuk jhuk ke dekhte hain

sahar ki lau mein jalaa rahi hai sabaa kanval rang-o-bu mein tar hain

darakht saare sajaae moti ki thaaliyaan saf-ba-saf khaDe hain

· · ·

ek aalam hai ye hairaani kaa jiinaa kaisaa

kuchh nahin hone ko hai apnaa ye honaa kaisaa

khuun jamtaa saa rag-o-pai mein hue shal ehsaas

dekhe jaati hai nazar haul tamaashaa kaisaa

· · ·

shaam se ham taa sahar chalte rahe

chuur the thak kar magar chalte rahe

sang ho jaate jo muD kar dekhte

ungliyaan kaanon mein dhar chalte rahe

· · ·

kab ek rang mein duniyaa kaa haal Thahraa hai

khushi ruki hai na koi malaal Thahraa hai

taDap rahe hain paDe roz o shab mein uljhe log

nafas nafas koi pechida jaal Thahraa hai

· · ·

kis ne kahaa kisi kaa kahaa tum kiyaa karo

lekin kahe koi to kabhi sun liyaa karo

har aarzu fareb hai har justuju saraab

machle jo dil bahut use samjhaa diyaa karo

· · ·

detaa thaa jo saayaa vo shajar kaaT rahaa hai

khud apne tahaffuz ki vo jaD kaaT rahaa hai

be-samt uDaanon se pashimaan parinda

ab apni hi minqaar se par kaaT rahaa hai

· · ·

kaanTe hon yaa phuul akele chunnaa hogaa

ham jaisaa mohtaat hamesha tanhaa hogaa

fikr o taraddud mein har dam kyaa ghulte rahnaa

hogaa to bas vo hi jo kuchh honaa hogaa

· · ·

zinda honaa aur na jiinaa tum hi kaho kyaa mumkin hai

khud ko kar denaa an-dekhaa tum hi kaho kyaa mumkin hai

aas ki lau aankhon mein jalaae laDti jaaun andheron se

raat hai raat kaa ho na saveraa tum hi kaho kyaa mumkin hai

· · ·

nazar aataa hai vo jaisaa nahin hai

jo kahte ho magar vaisaa nahin hai

nahin hotaa hai kyaa kyaa is jahaan mein

vahi jo chaahiye hotaa nahin hai

· · ·