Ghazal

ghaDiyaan ajiib hoti hain kuchh intizaar ki

haalat na puchiyegaa dil-e-be-qaraar ki

aankhein har ek shakhs ki rone lagin lahu

mausam ne rukhsati jo sunaai bahaar ki

· · ·

jo taalluq hai chaman mein phuul kaa khushbu ke saath

hai vahi rishta musalmaan kaa yahaan hindu ke saath

hai vahi nisbat hamaari sar-zamin-e-hind se

jo hai nisbat shaairi mein miir ki urdu ke saath

· · ·

manzilon ki chaah le kar raaston mein qaid hain

jitne the aazaad panchhi ghonslon mein qaid hain

jo ye kahte the hamaare paanv mein til hai janaab

aaj aise log bhi apne gharon mein qaid hain

· · ·

ik brahman ne kahaa hai mere haal-e-zaar par

ho ke momin mar rahaa hai kyuun but-e-pindaar par

dekh kar baarish ki bundein sochtaa rahtaa huun main

ro rahaa hai aasmaan bhi aaj hijr-e-yaar par

· · ·

zid pe hai duniyaa to zid pe teraa divaana bhi hai

paanv mein zanjir bhi teri taraf jaanaa bhi hai

TuuT kar dil ne hamaare kal tujhe chaahaa bhi thaa

TuuT kar dil ne hamaare aaj ye jaanaa bhi hai

· · ·

kuchh nazaakat na ho shokhi na ho andaaz na ho

husn vo husn kyaa jis husn mein kuchh naaz na ho

zulm ke saath hai ye shart bhi us zaalim ki

aah nikle bhi agar koi to aavaaz na ho

· · ·

is siyaasat mein miyaan aabaad ho jaane ke baad

mar gae kirdaar zindabaad ho jaane ke baad

ham se achchhaa kaun shaair thaa yahaan lekin janaab

fikr-o-fan jaataa rahaa ustaad ho jaane ke baad

· · ·

roz puchhe hai mire dil kaa bayaabaan mujh se

jaane kyon ruuTh gayaa jaan-e-bahaaraan mujh se

maut us vaqt masihaa ki tarah lagti hai

zindagi hoti hai jab dast-o-garebaan mujh se

· · ·

hamaare haal-e-dil ki tum ko kuchh aise khabar hogi

tumhaari aastin hogi hamaari chashm-e-tar hogi

hasin to aur bhi aa jaaeinge aaghosh mein lekin

kahaan ye marmarin baahein kahaan aisi kamar hogi

· · ·