Ghazal

us ki qurbat kaa tamaashaa bhi ajab hai saain

log bimaar samajhte hain ghazab hai saain

ab tabiat ke na lagne pe khulaa mahfil mein

ik vahi shokh nahin vaise to sab hai saain

· · ·

mujhe zamin hi likh us ko aasmaan likh de

kabhi likhi na gai ho vo daastaan likh de

kahaan main teri 'inaayaat par huun shikva-sanj

ki mere naam koi aur kahkashaan likh de

· · ·

tire dayaar talak yuun to aa hi jaate hain

ye aur baat tasavvur mein ji jalaate hain

miri udaas nazar kaa khayaal hai varna

use to chaand sitaare bahut bulaate hain

· · ·

hunar se apne kisi ko vo dang kyaa karte

ghurub ho gayaa suraj to jang kyaa karte

hamaare haath se mausam phisal gayaa varna

tumhin kaho ki salaatin rang kyaa karte

· · ·

maanaa ki samundar kaa kinaara bhi nahin hai

par lauT ke jaane kaa iraada bhi nahin hai

alfaaz ne sab khol diye raaz badan ke

vaise to kisi ne use dekhaa bhi nahin hai

· · ·

jab vo kahtaa hai samundar hai kinaaya us kaa

rang yak-lakht badaltaa hai saraapaa us kaa

kab pukaaregaa bhalaa naam bhanvar se meraa

kab bhalaa aaegaa phir mauj mein dariyaa us kaa

· · ·

husn se jab fareb khaayaa hai

kohsaaron se dil lagaayaa hai

duur rah kar bhi paas rah kar bhi

'ishq ko ham ne aazmaayaa hai

· · ·

qubul-e-'aam huaa huun to saf mein rakkhaa hai

havaa ne naam miraa sar-ba-kaf mein rakkhaa hai

guhar-shanaas ne bhi maslahat se kaam liyaa

yaqin kaa nuur to kab se sadaf mein rakkhaa hai

· · ·

use milaa hai fariza siyaahkaari kaa

sabaq fuzul paDhaanaa hai shahr-yaari kaa

tumhaare haath ne bakhshi hai jaan paudon ko

kahaan se siikh liyaa fan ye aabyaari kaa

· · ·

khayaal-o-khvaab ki duniyaa se istifaada kiyaa

hunar samajh ke isi kaam ko ziyaada kiyaa

ye tu ne kaun se mansab ki paasdaari ki

banaayaa miir mujhe khud ko mirzaada kiyaa

· · ·

shagufta phuul mein tishna-labi ko

abhi rahne do is jaadugari ko

akeli zindagi laakhon tamaashe

kahaan DhunDoge meri muflisi ko

· · ·

mire khayaal ki paakizgi pe chup kyon hai

adab-navaaz miri aagahi pe chup kyon hai

main sochtaa huun to raatein siyaah hoti hain

zamaana aaj tiri rahbari pe chup kyon hai

· · ·

baqaa ki chaah mein tu dekh be-makaan na ho

zamin teri haqiqat hai aasmaan na ho

rah-e-najaat mein manzil ki justuju kis ko

ye vo safar hai ki jis mein kabhi thakaan na ho

· · ·

kuchh aisaa huaa be-sar-o-saamaan miri jaan

duniyaa mujhe kahne lagi naadaan miri jaan

shoalon ko mayassar kahaan shabnam ki rifaaqat

khud ko na karo aise bhi halkaan miri jaan

· · ·

khud apne aap ko zanjir kartaa rahtaa hai

vo mere khvaab ki taabir kartaa rahtaa hai

ajab nahin ki use meri aarzu hi na ho

ki ab vo aane mein taakhir kartaa rahtaa hai

· · ·

kahin jaaun taalluq kaa sitaara chaltaa rahtaa hai

mire hamraah ye kis kaa ishaara chaltaa rahtaa hai

basirat kho gai lekin tavaqqoa hai bashaarat ki

kisi ke naam kaa ab bhi sahaaraa chaltaa rahtaa hai

· · ·

main jab bhi gaanv apne lauTtaa huun

kisi ki ruuh tishna dekhtaa huun

kai chehre shanaasaa us gali ke

kise aavaaz duun ye sochtaa huun

· · ·

rut badalti hai badaltaa nahin manzar saain

ab kahaan jaae bataa teraa qalandar saain

ik mire naam nahin teri sakhaavat varna

jagmagaataa hai karishma tiraa dar dar saain

· · ·

jhankaar kaa rishta to hai zanjir se saain

kyon log pareshaan hue taabir se saain

kuchh log abhi shahr mein aise bhi hain khush-posh

jo aag lagaa dete hain taqrir se saain

· · ·

yahaan nahin na sahi par kahin to ho jaae

havas jahaan ki nahin hai zamin to ho jaae

main apne saare taqaazon ko taaq par rakh duun

koi kisi kaa nahin hai yaqin to ho jaae

· · ·

kuchh yaad nahin kaise hunar bhuul gae hain

honaa thaa jinhein shams-o-qamar bhuul gae hain

duniyaa ke tamaashon ne kuchh uljhaayaa hai aisaa

kab shaam hui kab thi sahar bhuul gae hain

· · ·

dil-o-dimaagh pe aise vo chhaae jaate hain

ki ham bhi khvaab mein duniyaa basaae jaate hain

‘adaavaton se bhari hai ye khub-ru duniyaa

so ham charaagh-e-mohabbat jalaae jaate hain

· · ·

mujhe bhi jiine kaa ehsaas ab zaraa ho jaae

kabhi nikaal lo fursat to ratjagaa ho jaae

na aarzu na khalish kuchh nahin kisi dil mein

nigaah bhar ke jise dekh lo tiraa ho jaae

· · ·

khayaal-o-khvaab ki duniyaa se istifaada kiyaa

hunar samajh ke isi kaam ko ziyaada kiyaa

ye tu ne kaun se mansab ki paasdaari ki

banaayaa miir mujhe khud ko mirzaada kiyaa

· · ·