Ghazal

rahaa na jab koi hiila tujhe bhulaane kaa

pakaD liyaa gayaa rasta sharaab-khaane kaa

khamoshi-e-shab-e-tira ne kar diyaa paagal

vagarna shauq thaa kis ko makaan jalaane kaa

· · ·

sahraa hai ye hayaat yahaan ghar na DhunDhiye

so jaaiye zamin pe bistar na DhunDhiye

bante bikharte daaeron ke darmiyaan kahin

paani mein jo giraa thaa vo kankar na DhunDhiye

· · ·

shahr-e-ummid se kab koi sadaa aati hai

samt-e-sahraa se faqat garm havaa aati hai

is nadi ne to kai 'ishq Dubaae honge

is ki lahron se tabhi bu-e-hinaa aati hai

· · ·

ai mire thakte hue saae na kar takraar tu

ab safar mein rah gayaa hai ik miraa gham-khvaar tu

is qadar masruf thaa vo shakhs us ne ek din

khud se puchhaa aaj-kal rahtaa kahaan hai yaar tu

· · ·

saae ke liye apnaa shajar le ke chale hain

ham ghar se hi saamaan-e-safar le ke chale hain

ham le ke chale jo bhi jahaan mein thaa hamaaraa

ham apne sabhi 'aib-o-hunar le ke chale hain

· · ·

vaqt zaalim ne mulaaqaat nahin hone di

khud se ik pal bhi miri baat nahin hone di

us ki silan mire siine mein jami hai ab tak

meri aankhon ne jo barsaat nahin hone di

· · ·

mar ke bhi ku-e-salib-o-daar se uTThe nahin

bik gayaa sab phir bhi ham baazaar se uTThe nahin

ek gham aisaa ki jo gham-khvaar se uTThe nahin

aur davaa aisi ki jo bimaar se uTThe nahin

· · ·

thaa yaqin mein na vo gumaan mein thaa

jo khalaa qalb-o-jism-o-jaan mein thaa

nazr-e-aatish kiyaa jise main ne

main akelaa hi us makaan mein thaa

· · ·