Ghazal

khud ko bedaad kar ke roegaa

niind barbaad kar ke roegaa

main tujhe yaad kar ke roungi

tu mujhe yaad kar ke roegaa

· · ·

khud ko itnaa bhi talabgaar nahin karnaa thaa

baat karni thi magar pyaar nahin karnaa thaa

dekh ghusse ne tujhe aaj fanaa kar Daalaa

bas yahi kaam tujhe yaar nahin karnaa thaa

· · ·

raaz kyaa kyaa hain mire dil mein sunaaun kaise

zakhm kis kis ne diye hain ye bataaun kaise

teri yaadein mujhe bechain to karti hain magar

apne dil ko main kahin aur lagaaun kaise

· · ·

ye khushi thi ki us kaa pyaar milaa

aur ye gham ki ek baar milaa

us ke aane kaa raasta dekhaa

meri aankhon ko intizaar milaa

· · ·

kisi se dil lagaanaa chaahiye thaa

kisi kaa dil jalaanaa chaahiye thaa

hamaari aankh mein tum tairte ho

tumhein to Duub jaanaa chaahiye thaa

· · ·

aise vo jaane lagaa mujh ko dilaasa de kar

jaise bachche ko koi jaae khilaunaa de kar

jo bhi aataa hai Thahartaa hai chalaa jaataa hai

koi ruktaa hi nahin mujh ko sahaaraa de kar

· · ·

har vasile ko zamaane se judaa sochte hain

ye nai nasl ke bachche hain nayaa sochte hain

itni fursat hi nahin deti gharibi ham ko

ham kahaan kuchh bhi kamaane ke sivaa sochte hain

· · ·

haal kyaa hogaa munaafiq se mohabbat kar ke

ham bhi dekheinge zaraa ab ke siyaasat kar ke

is liye kahte ho duniyaa mein vafaadaar nahin

tum ne dekhaa hi nahin ham se mohabbat kar ke

· · ·