Ghazal

jaaeinge kahaan sar pe jab aa jaaegaa suraj

vo log jo divaar ke saae mein khaDe hain

allaah ye lamha to qayaamat ki ghaDi hai

insaan se insaan ke saae bhi baDe hain

· · ·

ham log to aakaas ki belon mein ghire hain

khush-bakht hain jo gulshan-e-hasti mein khile hain

is dhuup ki shiddat se nahin koi mafar ab

divaar ke saae mein baDe log khaDe hain

· · ·

ai ham-safaro kyuun na nayaa shahr basaa lein

apne hi usuul apni hi aqdaar banaa lein

jin logon ne ab tak mire honTon ko siyaa hai

sozan se miri soch kaa kaanTaa bhi nikaalein

· · ·

mashhur ho gayaa vo miraa pairahan liye

main phir rahaa huun shahr mein nangaa badan liye

main to kabhi kaa mar chukaa aur log ro chuke

ye kaun phir se aa gayaa meraa kafan liye

· · ·

achchhaa jise kahte hain vo lagtaa hai buraa bhi

insaan huun insaan se hoti hai khataa bhi

is shahr mein insaaf ki taarif alag hai

jo jurm karaae vahi detaa hai sazaa bhi

· · ·

jo raazdaar the pahle vo dushman-e-jaan hain

magar jo dushman-e-jaan the vo raazdaar hue

gunaah khud hi kiyaa khud ko phir sazaa de li

ham apne haathon kai baar sangsaar hue

· · ·

tiri gali si kisi bhi gali ki shaan nahin

ki is zamin pe sunte hain aasmaan nahin

mizha se baDh ke nahin hai jo koi tir-e-hasin

tumhaare abru se dilkash koi kamaan nahin

· · ·

mushkil se chaman mein hamein ek baar milaa phuul

bas haath lagaayaa thaa ki Tahni se jhaDaa phuul

khushbu jo nahin hai na sahi rang to dekho

baalon mein sajaa lo koi kaaghaz kaa banaa phuul

· · ·

kisi ki yaad hai aur hasraton kaa maatam hai

bahut dinon se lagaataar aankh pur-nam hai

ho zard zard na kyuun shama ki ziyaa yaaro

ki us ko apne pighalne kaa jaan-gusil gham hai

· · ·

kuchh baat nahin jism agar meraa jalaa hai

sad-shukr ki us bazm se sho'la to uThaa hai

maanaa ki mire lawn ki phir sabz hui ghaas

is meinh mein paDosi kaa makaan bhi to giraa hai

· · ·

jo dhuup ki tapti hui saanson se bachi soch

phir chaandni-raaton mein baDi der jali soch

aaraam se ik lamha bhi jiinaa nahin mumkin

har vaqt mire zehn mein rahti hai nai soch

· · ·

vo pahle andhe kuein mein giraae jaate hain

jo sang shishe ke ghar mein sajaae jaate hain

ajiib rasm hai yaaro tumhaari mahfil mein

diye jalaane se pahle bujhaae jaate hain

· · ·

shave baDhi hai saakit aankhein bikhre bikhre baal

'fakhr' tu kaise haal mein gum hai apnaa aap sanbhaal

main ne mez pe rakh Daale hain taash ke saare patte

ab to apne dil se saare vahm khayaal nikaal

· · ·

saari sochein zehn se jhaTko

saare moti khaak mein rolo

duniyaa se samjhauta kar lo

hiire kaaTo patthar bolo

· · ·

vo pahle andhe kunein mein giraae jaate hain

jo sang shishe ke ghar mein sajaae jaate hain

ajiib rasm hai yaaro tumhaari mahfil mein

diye jalaane se pahle bujhaae jaate hain

· · ·

ab paas-e-adab chhoDiye ab boliye qimat

baazaar mein le aai mujhe meri falaakat

phir shahr pe aaseb kaa saaya hai musallat

har aankh hai pathraai hui jism hain saakit

· · ·

us buDhe gadaagar se mujhe khauf lagaa thaa

andhaa thaa magar phir bhi mujhe dekh rahaa thaa

logon ne kahaa phuul thaa so maan gayaa main

patthar thaa jo us roz mire sar pe giraa thaa

· · ·

lamhon kaa bhanvar chiir ke insaan banaa huun

ehsaas huun main vaqt ke siine mein gaDaa huun

kahne ko to har mulk mein ghumaa huun phiraa huun

sochun to jahaan thaa vahin chup-chaap khaDaa huun

· · ·

lagti to hai mazbut magar kachchi baDi hai

ye unchi imaarat ki jo haDiyon pe bani hai

siina to hai kuchle hue jazbaat kaa madfan

chehre pe mahakte hue phulon ki laDi hai

· · ·

ye buzdili thi hamaari bahaaduri na hui

hazaar chaahaa magar phir bhi khud-kushi na hui

kuchh is tarah se khayaalon ki raushni phaili

tumhaari zulf bhi bikhri to tirgi na hui

· · ·

bahaaduri jo nahin hai to buzdili bhi nahin

bahut hi chaahaa magar ham se khud-kushi na hui

kuchh is tarah se khayaalon ne raushni bakhshi

tumhaari zulf bhi bikhri to tirgi na hui

· · ·

ai ham-safaro kyon na yahin shahr basaa lein

ham apne usuul apni hi aqdaar banaa lein

vo log jinhon ne mire honTon ko siyaa hai

sozan se miri soch kaa kaanTaa bhi nikaalein

· · ·