Ghazal

thi us ke liye khvaab ki taabir koi hiir

karti thi na raanjhe ko jo taskhir koi hiir

hoti hai vo izzat bhi vo beTi bhi hayaa bhi

kyuun pahne faqat ishq ki zanjir koi hiir

· · ·

ajiib chhaayaa hai khauf-o-hiraas aankhon mein

tumhaaraa dard nahin hai udaas aankhon mein

tamaam dasht pe taari hai vajd kaa aalam

junun kaa raqs sitaara-shanaas aankhon mein

· · ·

ghaayal hai teri shahzaadi shahzaade

tu ne jo har baat bhulaa di shahzaade

har jaanib ho ek munaadi shahzaade

teri ho gai ye shahzaadi shahzaade

· · ·

log karte hain faqat vaqt guzaari paagal

baat kartaa hai yahaan kaun hamaari paagal

us ne ik baar kahaa koi nahin tum jaisaa

tab se main lagne lagi khud ko bhi pyaari paagal

· · ·

kis ko apnaa haal sunaaein aap bataaein

kaise dil ko ham samjhaaein aap bataaein

aap kahein main baad mein apni kah lungi

aap kahein phir bhuul na jaaein aap bataaein

· · ·

tum bhi ab shahr se Dar jaate ho had karte ho

dekh kar mujh ko guzar jaate ho had karte ho

nain to yunhi tumhaare hain balaa ke qaatil

us pe tum roz sanvar jaate ho had karte ho

· · ·

naqsh takmil tak pahunchtaa hai

aks bas aap kaa ubhartaa hai

ab mohabbat ki aur had kyaa ho

meri beTi mein tu ubhartaa hai

· · ·

ranj-o-huzn-o-malaal naa saain

koi meraa kamaal naa saain

ik tire baa'd ho mire dil mein

aur koi khayaal naa saain

· · ·

usi kaa zikr kahaani se iqtibaas rahe

vo har ghaDi jo mire vaaste udaas rahe

ye us kaa qurb mujhe ishq ki ataa se milaa

vo duur jaae magar mere aas-paas rahe

· · ·

nazar udaas jigar be-qaraar chup khaamosh

tujhe kahaa na abhi sabr yaar chup khaamosh

ye manzilon ke sabhi vaahime machaaein shor

magar hai kis liye har rahguzaar chup khaamosh

· · ·

dil mein Thahraa dard nigoDaa kuza-gar

kaise moD pe tu ne chhoDaa kuza-gar

main bhi khud se ruThi ruThi rahti huun

jab se tu ne mukh hai moDaa kuza-gar

· · ·

husn-e-saada kaa vaar aankhein hain

bin tire be-qaraar aankhein hain

meri jaanib hai jo tiraa chehra

meri jaanib hazaar aankhein hain

· · ·

tum ho meri ziist kaa haasil shahzaade

toD na denaa tum meraa dil shahzaade

apne andar tum ko dekh rahi huun main

aaina hai mere muqaabil shahzaade

· · ·

yunhi dukh ho jaaveinge kam shahzaade

aa jaa sukh ke khvaab bunein ham shahzaade

apne hosh ganvaa baiThi huun phir se aaj

soch rahi huun tujh ko har dam shahzaade

· · ·

main boli tere lab par hai hansi meri

vo bolaa mat baDhaao bekali meri

main boli shaahzaade mol kyaa meraa

vo bolaa shaahzaadi zindagi meri

· · ·

zulf-e-mohabbat barham barham mi raqsam

vajd mein hai phir chashm-e-pur-nam mi raqsam

ishq ki dhun mein aankhein naghma gaati hain

ghol mire jazbon mein sargam mi raqsam

· · ·

mujh ko to kuchh aur dikhaa hai aankhon ke us paar

tum batlaao aakhir kyaa hai aankhon ke us paar

sapnaa koi bikhar chukaa hai aankhon ke us paar

dariyaa jaise TuuT paDaa hai aankhon ke us paar

· · ·