Ghazal

kab talak ham ko na aavegaa nazar dekhein to

kaise tarsaataa hai ye dida-e-tar dekhein to

ishq mein us ke ki guzre hain sar o jaan se ham

apni kis taur se hoti hai guzar dekhein to

· · ·

hai yaad tujh se meraa vo sharh-e-haal denaa

aur sun ke teraa us ko hans hans ke Taal denaa

kar kar ke yaad us ki behaal huun nihaayat

fursat zaraa tu mujh ko tu ai khayaal denaa

· · ·

aae hain ham jahaan mein gham le kar

dil-e-pur-khun o chashm-e-nam le kar

saaghar-e-mai kahaan hai ai gardun

kyaa karein teraa jaam-e-jam le kar

· · ·

kare aashiq pe vo bedaad jitnaa us kaa ji chaahe

rakhe dil ko mire naashaad jitnaa us kaa ji chaahe

hamein bhi sabr khaatir-khvaah daad-e-haq hai ulfat mein

vo de jaur o jafaa ki daad jitnaa us kaa ji chaahe

· · ·

har taraf hai us se mere dil ke lag jaane mein dhuum

bulbul-o-gul mein hai chah-chah sham-o-parvaane mein dhuum

fitna-gar hai naaz-o-ishva us ki chashm-e-shokh mein

juun machaavein pi ke mai badmast mai-khaane mein dhuum

· · ·

rakhaa paa jahaan mein nagaaraa zamin par

bahut sar ko vaan ham ne maaraa zamin par

junun josh maare hai divaar-o-dar se

huaa kis pari kaa guzaaraa zamin par

· · ·

'ishq mein gul ke jo naalaan bulbul-e-ghamnaak hai

gul bhi us ke gham mein dekho kyaa garebaan-chaak hai

daagh-bar-daagh ashk-bar-ashk apni chashm o dil mein hain

kyaa balaa gul-khez ai yaaro ye musht-e-khaak hai

· · ·

vafaa ke hain khvaan par nivaale ze-aaab avval duvam ba-aatish

bhare hai saaqi yahaan pyaale ze-aab avval duvam ba-aatish

chaman mein josh-e-junun ke hain ashk aur daagh-e-darun se apne

karun shagufta gul aur laale ze-aab avval duvam ba-aatish

· · ·

raah-raste mein tu yuun rahtaa hai aa kar ham se mil

kam gayaa lekin vo yaar-e-khaangi ghar ham se mil

dil taDaptaa hai paDaa is sina-e-sad-chaak mein

khol kar band-e-qabaa tu ai saman-bar ham se mil

· · ·

ek-dam khushk miraa dida-e-tar hai ki nahin

maajare se mire tujh ko bhi khabar hai ki nahin

yuun to uThte hai mire dil se hazaaron naale

lekin in khaana-kharaabon mein asar hai ki nahin

· · ·

in donon ghar kaa khaana-khudaa kaun ghair hai

shaikh-e-haram abas the inkaar-e-dair hai

ai yaar-e-be-khabar tu miri le na le khabar

vird-e-zabaan tiraa hi mujhe zikr-e-khair hai

· · ·

kam-tar yaa beshtar gae ham

us dar se ba-chashm-e-nam gae ham

ik gul na chunaa ham us chaman se

le apnaa hi musht-e-par gae ham

· · ·

dekhein tujhe na aaveinge ham

kahnaa nahin kar dikhaaveinge ham

ye jaur koi uThaave kab tak

uTh dar hi se tere jaaveinge ham

· · ·

jo hamein chaahe us ke chaakir hain

yaar-e-shaatir na baar-e-khaatir hain

yaad hai ham se pyaar se kahnaa

tujh se ham sab tarah se haazir hain

· · ·

azizo tum na kuchh us ko kaho huaa so huaa

nipaT hi tund hai zaalim ki khu huaa so huaa

khataa se us ki nahin naam ko ghubaar-e-malaal

main ro ro Daalaa hai sab dil se dho huaa so huaa

· · ·

us zulf se dil ho kar aazaad bahut royaa

ye silsila-e-ulfat kar yaad bahut royaa

rahm us ko na thaa hargiz har chand bahaal-e-sag

us kuche mein main kar kar fariyaad bahut royaa

· · ·

na chhuTaa haath se yak lahza garebaan meraa

chashm-e-tar hi pe rahaa gosha-e-daamaan meraa

jis taraf guzre kare ru-e-zamin ko gulzaar

sair-e-gulshan se phire jab gul-e-khandaan meraa

· · ·

jis kaa mayassar na thaa bhar ke nazar dekhnaa

kahtaa hai khat aae par Tuk to idhar dekhnaa

bolaa vo hans ke ki haan dekhe hain tujh se bahut

main jo kahaa hai gharaz mujh ko magar dekhnaa

· · ·

yaar ibtidaa-e-ishq se be-zaar hi rahaa

bedard dil ke dar piye aazaar hi rahaa

jis din se dost rakhtaa huun us ko hijaab-e-husn

apnaa hamesha dushman-e-didaar hi rahaa

· · ·

gar ishq se vaaqif mare mahbub na hotaa

hotaa na main mahjur vo mahjub na hotaa

aafat-talab apne jo dil o diida na hote

taalib main tiraa tu miraa matlub na hotaa

· · ·

yaa ilaahi miraa dildaar salaamat baashad

vo vali nemat-e-didaar salaamat baashad

nek-o-bad se hai miri khaatir-e-naashaad aazaad

gham-gusaar apnaa gham-e-yaar salaamat baashad

· · ·

meri us pyaari jhab se aankh lagi

us saraapaa ajab se aankh lagi

ishq mein khvaab kaa khayaal kise

na lagi aankh jab se aankh lagi

· · ·

ham aap ko to ishq mein barbaad kareinge

taasir-e-vafaa par tujhe kyaa yaad kareinge

yaan sakht dilon mein nahin hamdam koi apnaa

jaa koh mein farhaad ko fariyaad kareinge

· · ·

kab talak pivegaa tu tar-daamanon se mil ke mul

ek dam ai ghuncha-lab ham se kabhi to khil ke khul

be-sar-o-bargon ko kyaa nisbat hai sair-e-baagh se

daagh-e-dil hain ham tahi-dastaan-e-paa dar-gil ke gul

· · ·