Ghazal

gulon se ishq gulistaan se pyaar karte rahe

bhari khizaan mein bhi zikr-e-bahaar karte rahe

hamaari be-khudi-e-shauq ki na puchho ki ham

tire qarib tiraa intizaar karte rahe

· · ·

ik musalsal gham kaa saamaan hai jahaan rahtaa huun main

fikr hairaan dil pareshaan hai jahaan rahtaa huun main

apne shaanon par uThaa ke apne armaanon ki laash

bad-tar-az-haivaan insaan hai jahaan rahtaa huun main

· · ·

mire dast-e-junun ki fitna-saamaani ko kyaa kahiye

ki ik aalam pareshaan hai pareshaani ko kyaa kahiye

jahaan-e-rang-o-bu ki vusatein vaqat nahin rakhtin

mire josh-e-takhayyul ki faraavaani ko kyaa kahiye

· · ·

khabar nahin ki zamin hain ki aasmaan hain ham

khabar nahin ki bhanvar hain ki baadbaan hain ham

na zaad-e-raah na himmat na manzil-e-maqsud

na jaane kaunsi manzil ke kaarvaan hain ham

· · ·

kis ko khoyaa hai kis ko paayaa hai

baarhaa ye khayaal aaya hai

zindagi ki karaahaton par bhi

ham ko aaya to pyaar aaya hai

· · ·

ik nae Dhang se tartib de maikhaane ko

saaqiyaa der na kar toD de paimaane ko

apni qismat mein kahaan vasl ki ghaDiyaan ai dost

ye ghanimat hai ki aa jaate hain maikhaane ko

· · ·

dushman-e-jaan se dushmani bhi nahin

jaan-e-jaanaan se dosti bhi nahin

ye taghaaful hai ye tajaahul hai

sach to ye hai ki saadgi bhi nahin

· · ·

kuchh tire intizaar ne maaraa

kuchh dil-e-be-qaraar ne maaraa

kuchh gham-e-dil ne kar diyaa majbur

kuchh gham-e-rozgaar ne maaraa

· · ·

kuchh is tarah bhi ham ne guzaari hai pyaar mein

dil mein hujum-e-yaas nigah intizaar mein

ab bazm-e-aish se bhi uThaa jaa rahaa hai dil

ab lutf aa rahaa hai gham-e-rozgaar mein

· · ·