Ghazal

mire gumaan se bhi unchi uDaan tak pahunchi

miri ghazal ki zamin aasmaan tak pahunchi

vo baat jis ki khabar tak na thi zamaane ko

tumhaari vajh se duniyaa ke kaan tak pahunchi

· · ·

faqat main kyon rahun rusvaa tiri rusvaai bhi to ho

sitamgar teri mahfil mein shab-e-tanhaai bhi to ho

tujhe paane ki khvaahish mein jo rakh de jaan bhi girvi

zamaane mein mire jaisaa koi saudaai bhi to ho

· · ·

jis par jabin jhukaai thi vo dar talaash kar

jis ghar ko tu ne chhoDaa hai vo ghar talaash kar

chaandi na sonaa hiiraa na gauhar talaash kar

uqbaa mein kaam aae vo zevar talaash kar

· · ·

vo jo mujh se khafaa nahin hotaa

main bhi us se judaa nahin hotaa

kaash rahbar milaa nahin hotaa

main safar mein luTaa nahin hotaa

· · ·

mizaaj dard kaa khugar isi liye to hai

gham-e-firaaq muqaddar isi liye to hai

tujhe khabar thi miraa dil hai aaina jaisaa

ye guftugu tiri patthar isi liye to hai

· · ·

samjhein jo mere gham ko vo apne nahin rahe

jhuTe bahut hain shahr mein sachche nahin rahe

tu ne to apni ziist bhi kar li basar magar

tujh se bichhaD ke ham to kahin ke nahin rahe

· · ·

main dil mein zakhm us ke phir sulagtaa chhoD aaya huun

ki sehn-e-gulsitaan mein ik sharaara chhoD aaya huun

kaDakti dhuup mein baadal barastaa chhoD aaya huun

main us ki aankh mein ashkon kaa dariyaa chhoD aaya huun

· · ·

mujhe ye fakhr hai tum ko khayaal rahtaa hai

tumhaare zehn mein koi 'hilaal' rahtaa hai

abhi lagi hi nahin shohraton ki garm havaa

abhi se khuun mein itnaa ubaal rahtaa hai

· · ·

rab ne 'ataa kiye hain muqaddar alag alag

hote hain shohraton ke bhi manzar alag alag

maayus vo bhi aur pareshaan main bhi huun

khaai bichhaD ke choT dilon par alag alag

· · ·

mire nikaah se pahle ye baat likh denaa

tum apne mehr mein meri hayaat likh denaa

miri tamanna hai ho jaaun tum se main mansub

tum apnaa naam mire saath saath likh denaa

· · ·