Ghazal

kal aaeinge vo ghar par

aankh abhi se hai dar par

jaane kab se soyaa hai

ghaas ugi hai ajgar par

· · ·

villain ko film mein hero to maar detaa hai

haqiqaton mein villain sar utaar detaa hai

zarur koi miraa qarz utaar detaa hai

isi liye vo mujhe phir udhaar detaa hai

· · ·

zehn-o-dil par yuun to ragDi hain baraabar eDiyaan

shaa'iri ki kar na paae phir bhi ham tar eDiyaan

haq-bayaani is qalam se phir to mumkin hi nahin

hain hukumat ki agar rakkhi qalam par eDiyaan

· · ·

adiib yuun to lagaate hain dhaar muddat se

magar milaa na adab ko qaraar muddat se

dabe hain raakh mein jo bhi sharaar muddat se

unhin havaaon kaa hai intizaar muddat se

· · ·

rab ne jab lamhe diye in'aam ke

jism ko kapDe mile ehraam ke

mere baalon mein safedi aa gai

aa gae hain din mire anjaam ke

· · ·

'aks ko dhundhlaa dikhaataa ho agar achchhaa nahin

chaahe sone mein jaDaa ho vo mirror achchhaa nahin

chaaT jaataa hai badan ko ranj dimak ki tarah

ranj-o-gham kuchh din hai behtar 'umr-bhar achchhaa nahin

· · ·

gali-kuchon kaa zehn-o-dil mein ik naqsha banaa rakhnaa

zabaani yaad apne yaar ke dar kaa pata rakhnaa

maraz kaafur hogaa bas hamaare paas baiTho tum

ki chaaraagar ne bolaa hai qarib apne davaa rakhnaa

· · ·

luTaae jaate hain jab bhi kahin langar mohabbat ke

vahaan sultaan aate hain nazar naukar mohabbat ke

qayaamat tak mahak aati rahegi un zaminon se

jahaan Thahre hain pal-do-pal kabhi lashkar mohabbat ke

· · ·

tere dil mein base nahin the ham

'ishq mein kyaa khare nahin the ham

kis tarah teri khairiyat milti

facebōk se juDe nahin the ham

· · ·

ye baat sach hai abhi mukammal to 'ishq meraa huaa nahin hai

abhi to daaman phaTaa nahin hai lahu nazar se bahaa nahin hai

bahut puraani kitaab se jo gulaab niklaa to aah nikli

is aah se ye 'ayaan huaa hai ki zakhm dil kaa bharaa nahin hai

· · ·

raaz khulaa to apni hi rusvaai hai

kaise kah duun dushman meraa bhaai hai

ye jo calender mein ek july hai

college mein un se milvaane laai hai

· · ·