Ghazal

yunhi kabhi machal gae yunhi kabhi bahal gae

ham ko kahaan qaraar thaa tum se mile sanbhal gae

dil ki kabhi suni nahin aur kabhi to be-sabab

aankh zaraa si nam hui us ki taraf nikal gae

· · ·

zaraa badlaa nahin manzar vahi hai

vahi hai dasht ye lashkar vahi hai

nai hai kuchh badan mein be-qaraari

magar kamra vahi bistar vahi hai

· · ·

aasmaan surkh huaa naala-e-shab-gir ke baad

haal-e-dil us pe khulaa hai baDi taakhir ke baad

talab-e-khvaab mein kitni thiin pareshaan aankhein

kitni hairaan hain ab khvaab ki taabir ke baad

· · ·

baDhe zaraa jo ye mauj-e-vahshat to ham bhi koi kamaal kar lein

kisi ko koi javaab de dein kisi se koi savaal kar lein

us ek sone se ghar ke ai dil rakhaa hi kyaa hai ab us gali mein

ki jaaein karne ko zakhm taaza aur apni aankhon ko laal kar lein

· · ·

tum jahaan the vahaan ke the hi nahin

yaani tum is jahaan ke the hi nahin

kaise uljhe hain kaar-e-duniyaa mein

ham jo sud-o-ziyaan ke the hi nahin

· · ·

gali gali tiri shohrat nahin karungaa main

ab aisi hijr mein haalat nahin karungaa main

hamesha kaam bigaaDaa hai be-qaraari ne

vo ab milegaa to ujlat nahin karungaa main

· · ·

mizaaj-e-shahr jo tahrir karne nikle hain

ham apne aap ko dil-gir karne nikle hain

nikal ke khvaab-saraa se bujhaa ke chashm-e-gumaan

khayaal-o-khvaab ko taabir karne nikle hain

· · ·

kabhi utrein agar poshaak ke rang

falak dekhegaa meri khaak ke rang

baDi mushkil mein hai ab ye zamin-zaad

judaa kar khaak se aflaak ke rang

· · ·

ajiib rang liye aaj milne aayaa vo

zaraa si der mein lagne lagaa paraayaa vo

vahi gali hai vahi shaam hai vahi vahshat

par us dariche mein chehra na jhilmilaayaa vo

· · ·

raqs karnaa tiraa kis ne dekhaa yahaan ye havaa aur hai vo fazaa aur thi

ai miri sarkhushi vahshat-e-jism-o-jaan ye havaa aur hai vo fazaa aur thi

is gali us gali mujh ko le kar phire ab vo vahshat nahin ab vo haalat nahin

hai dhDaknaa ajab mere dil kaa yahaan ye havaa aur hai vo fazaa aur thi

· · ·

khvaab le kar kahaan nikal aae

tum yahaan raaegaan nikal aae

dil yahaan se uchaaT ho jaataa

log kuchh mehrbaan nikal aae

· · ·

kabhi to is aab-o-havaa ko badal kar

mujhe dekh khud se tu baahar nikal kar

tamaashaa nahin hai faqat teri duniyaa

khulaa bhed mujh par ye ghar se nikal kar

· · ·

ajab marhalon se guzaaraa gayaa main

phir is khaak-daan par utaaraa gayaa main

zarurat nahin thaa main din bhar kisi ki

jahaan shaam aai pukaaraa gayaa main

· · ·

is kharaabe mein kahin hain ham bhi

be-khabar dekh yahin hain ham bhi

tere hone se tamaashaa saaraa

tu nahin hai to nahin hain ham bhi

· · ·

rang us kaa nayaa nazar aayaa

shaam thaa dhuup saa nazar aayaa

vahi kamra vahi thaa sab saamaan

vo magar dusraa nazar aayaa

· · ·