Ghazal

do roz mein shabaab kaa aalam guzar gayaa

gulshan mein ek phuul khilaa aur bikhar gayaa

uDne lagi hai raah-e-tamannaa mein dhuul si

ye kis ke saath mausam-e-armaan guzar gayaa

· · ·

gulshan-e-ummid yuun ujDaa ki sahraa ho gayaa

us ne aankhein pher liin har su andheraa ho gayaa

mauj-ta-ba-mauj phaili hai bisaat-e-kaaenaat

pyaas jab Duubi samundar aur gahraa ho gayaa

· · ·

zikr-e-gham par malaal kyon aaya

shisha-e-dil mein baal kyon aaya

mutmain huun main haalat-e-dil par

tumhein meraa khayaal kyon aaya

· · ·

junun-e-shauq mein aashufta-saamaanon pe kyaa guzri

khirad-mandon pe kyaa biiti garebaanon pe ki guzri

vo jin ke khuun se rangin tumhaari bazm-e-ishrat hai

kabhi sochaa hai un majbur insaanon pe kyaa guzri

· · ·

kisi raahbar ki hai justuju kisi rahnumaa ki talaash hai

jo sharik-e-mauj-e-hayaat ho usi naakhudaa ki talaash hai

na rukh-e-sanam ki hai aarzu na dar-e-khudaa ki talaash hai

jo shuur-e-karb ataa kare usi dilrubaa ki talaash hai

· · ·

mire khulus kaa jab aap ko khayaal nahin

mujhe bhi tark-e-taalluq kaa kuchh malaal nahin

hain zakhm-e-shauq miri zindagi kaa sarmaaya

huun mutmain ki mujhe fikr-e-indimaal nahin

· · ·

dard siine mein uThe bhi to dabaae rakhnaa

gham-e-haalaat se har lamha nibhaae rakhnaa

apne ehsaas ko aandhi se bachaae rakhnaa

is andhere mein koi shama jalaae rakhnaa

· · ·

yahaan ishq mast-e-alast hai yahaan shakl kyaa yahaan naam kyaa

ye jahaan-e-mauj-e-khayaal hai yahaan aql-o-fikr se kaam kyaa

rah-e-ishq ki ye tajalliyaan yahaan gum hue kai kaarvaan

kai pech-o-kham hain yahaan vahaan kisi jaa pe koi qiyaam kyaa

· · ·

ye kaisi fasl-e-bahaar aai gulon kaa siina figaar saa hai

har ik nazar hai sukun se aari har ek dil be-qaraar saa hai

chaman ke jo paasbaan hain sochein isi ko kahte hain kyaa gulistaan

shafaq mein shaamil hai gham ki surkhi ufuq pe khun-e-bahaar saa hai

· · ·