Ghazal

gum-shuda saae DhunDhtaa huun main

lamha ban kar Thahar gayaa huun main

zaahiri shakl meri zinda hai

aur andar se mar gayaa huun main

· · ·

in andheron se pare is shab-e-gham se aage

ik nai subh bhi hai shaam-e-alam se aage

dasht mein kis se karein aabla-paai kaa gilaa

rahnumaa koi nahin naqsh-e-qadam se aage

· · ·

nigaah aaina hai aks-e-mustaaar huun main

hayaat qarz hai mujh par to zer-e-baar huun main

pighal na jaae anaa shiddat-e-tamaazat se

giraan hai tab-e-kharidaar kam-ayaar huun main

· · ·

bahut hassaas-o-naazuk aabgine vaalaa main tanhaa

sharaabein pheink kar zahraab piine vaalaa main tanhaa

nae lashkar nae neze nai shartein hain baiat ki

ye kis kuufe mein huun makke madine vaalaa main tanhaa

· · ·

sahme se the parind baseraa udaas thaa

jangal ki tarah shahr mein khauf-o-hiraas thaa

donon hi ajnabi the magar TuuT kar mile

main dard-aashnaa vo sitaara-shanaas thaa

· · ·

ghuncha jo sar-e-shaakh chaTakte hue dekhaa

pahlu mein bahut dil ko dhaDakte hue dekhaa

mehndi-rache haathon ne uThaayaa hi thaa ghunghaT

ik shola-e-javvaala lapakte hue dekhaa

· · ·

uThaao lauh-o-qalam haadse tamaam likhun

ravaan sadi mein huaa hai jo qatl-e-aam likhun

nasim-e-subh ibaarat hai teri khushbu se

sabaa ki narm-ravi ko tiraa khiraam likhun

· · ·

rotaa huun qadr-daan-e-mataa-e-hunar ko main

laaun kahaan se DhunDh ke us dida-var ko main

sad haasil-e-tarab hai rifaaqat ki ye ghaDi

vo mujh ko dekhte hain charaagh-e-sahar ko main

· · ·

ham se puchhaa kyaa biiti hai aakhir-e-shab ke maaron par

sahraa sahraa rang bikhere raqs kiyaa angaaron par

ik saaya sharmaataa lajaataa raah mein tanhaa chhoD gayaa

main parchhaain DhunD rahaa huun TuuTi hui divaaron par

· · ·

daryaaft kar ke khud ko zamaane se duur huun

har shakhs baa-shuur hai main be-shuur huun

hijrat miraa nasib hai parvaaz mashghala

gumbad ke daaere mein misaal-e-tuyur huun

· · ·

vo ek sajda ki jo be-rukua hotaa hai

ajab maqaam-e-khushu-o-khuzua hotaa hai

bisaat ulaTti hai shab ki sitaare bujhte hain

charaagh gul karo suraj tulua hotaa hai

· · ·

haath mein jab tak qalam thaa tajribe likhte rahe

ham zamin par aasmaan ke mashvare likhte rahe

umr kitni kaT gai hijrat mein sochaa hi nahin

chehre ki saari lakirein aaine likhte rahe

· · ·

taab-e-nigaah thi to nazaara bhi dost thaa

us chashm-e-nargisin kaa ishaara bhi dost thaa

TuuTaa to aasmaan se khalaaon mein kho gayaa

jab tak chamak rahaa thaa sitaara bhi dost thaa

· · ·

shaam kajlaai hui raat abhaagan jaisi

rut nahin aati kisi gaanv mein saavan jaisi

rang Tesu mein khile hain tiri chunari ki tarah

ban mein phulon ki mahak hai tire aangan jaisi

· · ·

yuun zindagi guzar rahi hai meri

jo un ki hai vahi khushi hai meri

dekhe the farsh-e-gul ke khvaab lekin

shoalon se rah-guzar saji hai meri

· · ·

khelaa bachpan jhumaa laDakpan lahki javaani chaubaaron mein

laaThi thaame dekhaa buDhaapaa nagri ke galiyaaron mein

nirt pe jhumein bhaav pe lahkein madiraa pi kar bahkein log

kaun sune jo chikhein dabi hain paael ki jhankaaron mein

· · ·

hamaare jismon mein din hi kaa zahr kyaa kam thaa

barahna raat bhi aai to sabz mausam thaa

halaakaton kaa sila qaatilon se kyaa miltaa

ki qatra qatra lahu kaa nazar mein shabnam thaa

· · ·