Ghazal

de sanam hukm tu dar par tire haazir ho kar

paD rahe koi musalmaan bhi kaafir ho kar

chuTkiyaan lene ko bas rah chuke pinhaan dil mein

kabhi pahlu mein bhi aa baiThiye zaahir ho kar

· · ·

tasavvur ham ne jab teraa kiyaa pesh-e-nazar paayaa

tujhe dekhaa jidhar dekhaa tujhe paayaa jidhar paayaa

kahaan ham ne na is dard-e-nihaani kaa asar paayaa

yahaan uTThaa vahaan chamkaa idhar aayaa udhar paayaa

· · ·

kyuun vasl mein bhi aankh milaai nahin jaati

vo farq dilon kaa vo judaai nahin jaati

kyaa dhuum bhi naalon se machaai nahin jaati

soti hui taqdir jagaai nahin jaati

· · ·

jaane vaalaa iztiraab-e-dil nahin

ye taDap taskin ke qaabil nahin

jaan de denaa to kuchh mushkil nahin

jaan kaa khvaahaan magar ai dil nahin

· · ·

yaad aa ke tiri hijr mein samjhaaegi kis ko

dil hi nahin siine mein to bahlaaegi kis ko

dam khinchtaa hai kyuun aaj ye rag rag se hamaaraa

kyaa jaane idhar dil ki kashish laaegi kis ko

· · ·

miri shaaki hai khud meri fughaan tak

ki taalu se nahin lagti zabaan tak

koi hasrat hi le aae manaa kar

mire ruThe hue dil ko yahaan tak

· · ·

muddat ke baad munh se lagi hai jo chhuT kar

to ye bhi mai pe girti hai kyaa TuuT TuuT kar

mehndi thaa meraa khuun ki hotaa jo raaegaan

ik shab ke baad haath se qaatil ke chhuT kar

· · ·

mar ke bhi qaamat-e-mahbub ki ulfat na gai

ho chukaa hashr bhi lekin ye qayaamat na gai

shab ko mai khuub si pi subh ko tauba kar li

rind ke rind rahe haath se jannat na gai

· · ·

vo dil nasib huaa jis ko daagh bhi na milaa

milaa vo gham-kada jis mein charaagh bhi na milaa

gai thi kah ke main laati huun zulf-e-yaar ki bu

phiri to baad-e-sabaa kaa dimaagh bhi na milaa

· · ·

garebaan ko junun mein taa-ba-daaman chaak honaa thaa

javaab-e-jaada-e-sahraa-e-vahshat-naak honaa thaa

taghaaful ke gile sun kar jhukaa liin tum ne kyon aankhein

mire sharminda karne ko zaraa bebaak honaa thaa

· · ·

sad-shukr bujh gai tiri talvaar ki havas

qaatil yahi thi tere gunahgaar ki havas

murde ko bhi mazaar mein lene na degi chain

taa-hashr tere saaya-e-divaar ki havas

· · ·

paa-shikaston ko jab jab mileinge aap

sar-e-raah-e-talab mileinge aap

un se puchaa ki kab mileinge aap

bole jab jaan-ba-lab mileinge aap

· · ·

jafaa ki us se shikaayat zaraa nahin aati

vo yaad hi hamein shukr-e-khudaa nahin aati

nikal ke taa-ba-lab aah-e-rasaa nahin aati

karaahtaa hai jo ab dil sadaa nahin aati

· · ·

na Theri jab koi taskin-e-dil ki shakl yaaron mein

to aa nikle taDap kar ham tumhaare be-qaraaron mein

kisi ke ishq mein dard-e-jigar se dil ye kahtaa hai

idhar bhi aa nikalnaa ham bhi hain ummidvaaron mein

· · ·

subh ho shaam judaai ki ye mumkin hi nahin

hijr ki raat vo hai jis ke liye din hi nahin

subh karnaa shab-e-gham kaa kabhi mumkin hi nahin

aa ke din pher de apne vo koi din hi nahin

· · ·

be-baak na dekhaa koi qaatil ke baraabar

sharm aankh mein paai na gai til ke baraabar

dushman koi ai yaar miraa aur tiraa dost

hogaa na zamaane mein mire dil ke baraabar

· · ·

shab-e-vaada hai tu hai aur main huun

hujum-e-aarzu hai aur main huun

dil-e-begaana-khu hai aur main huun

baghal mein ik adu hai aur main huun

· · ·