Ghazal

jab jaan pe lab-e-jaanaan ki mahak ik baarish manzar ho jaae

ham haath baDhaaein aur is mein mahtaab gul-e-tar ho jaae

kab dil kaa laDakpan jaaegaa har vaqt yahi hai zid us ki

jo maange usi pal mil jaae jo soche vahin par ho jaae

· · ·

baahar damakti barf mein andar mahakti raat mein

us ke badan kaa phuul hai jaise havaa ke haat mein

khiDki se chhante chaand mein nazdik aatish-daan ke

zulfon kaa saaya oDh ke baiThi hain aankhein ghaat mein

· · ·

yaad ke darichon mein baarishon ke manzar hain

kis nagar ki baatein hain kin ruton ke manzar hain

ajnabi dayaaron mein shauq-e-did le jaao

kuchh nahin to har jaanib dilbaron ke manzar hain

· · ·

shauq ke shahr-e-tamannaa ke Thikaane guzre

raat phir zehn se kuchh khvaab puraane guzre

chaand jab jhiil mein utraa to manaazir ki tarah

mujh ko chhukar tire baazu tire shaane guzre

· · ·

dil sulagtaa hai na ab yaad koi aati hai

gard si hai jo khayaalon pe jami jaati hai

duur peDon se ulajhti hai har aandhi lekin

zard patton ko mire ghar mein uThaa laati hai

· · ·

tanhaa har ek rah se guzar jaanaa chaahiye

jaise jiye hain vaise hi mar jaanaa chaahiye

jaane ye dil kaa dard kahaan tak sataaegaa

dariyaa chaDhe to us ko utar jaanaa chaahiye

· · ·

haT ke us rah se jo hai vaqf bas inkaar ke naam

aao phir sher kahein gesu-e-dildaar ke naam

zahr-e-gham le to chalaa jaan ko magar tishna-labi

jura ik aur tamannaa-e-lab-e-yaar ke naam

· · ·

ye kis maqaam-e-tamannaa se dil guzarne lagaa

havaa hai jism mein ik zahr saa utarne lagaa

ulajh rahaa hai tiri bu-e-pairahan se badan

ki phuul halqa-e-baazu kaa kaam karne lagaa

· · ·

dil kaa ahvaal zamaane pe ayaan ho saktaa

lafz ai kaash tamannaa ki zabaan ho saktaa

ye samajhte hi nahin dard kaa baais kyaa hai

meraa dil kaash dil-e-chaara-garaan ho saktaa

· · ·

kaliyon ki tarah dhulaa dhulaa hai

vo jism shumaal mein banaa hai

gul-baar hain zulf o shaana us ke

qaamat mein vo tavil o dilrubaa hai

· · ·