Ghazal

hosh manzil kho ke manzil kaa pataa paate hain log

tark-e-lazzat mein to kuchh lazzat sivaa paate hain log

dard ke maaron ko hi dard-aashnaa paate hain log

be-vafaaon mein kahaan bu-e-vafaa paate hain log

· · ·

agar na dard se is dil ko aashnaa karte

gham-e-hayaat kaa kis tarah tajziyaa karte

khudaa-na-khvaasta kashti jo Dubne lagti

sivaa khudaa ke bhalaa kyaa ye naakhudaa karte

· · ·

tere divaane ne divaar mein dar kholaa hai

sar-e-aflaak nayaa baab-e-qamar kholaa hai

Dhal gayaa din bhi vahin raat ne Deraa Daalaa

thak ke rahrav ne jahaan rakht-e-safar kholaa hai

· · ·

munfarid to hai tiraa koi muqaabil na huaa

koi makhluq bhi kaunain mein kaamil na huaa

ik tamaashaa vo bhi didaar ke qaabil na huaa

raqs-e-bismil jo sar-e-kucha-e-qaatil na huaa

· · ·

lutf-e-hayaat-e-nau hai har ik inqalaab mein

hain asl zindagi ke maze pech-o-taab mein

yuun to bahut si baatein hain dil ki kitaab mein

lekin hai gham kaa tazkira har ek baab mein

· · ·

lab-e-naazuk pe jab hansi aai

aag har-su bikherti aai

jaane kyaa baiThe baiThe yaad aayaa

rukh-e-aashiq pe taazgi aai

· · ·

masti-e-do-aalam ik markaz pe simaT aai

so kar vo uThaa kuchh yuun letaa huaa angDaai

pur-shauq nazar meri kuchh dekh ke lalchaai

kuchh us ke ishaaron se vo hausla-afzaai

· · ·

kuchh sham' se puchho na shab-e-taar se puchho

kyaa hijr mein biiti ye dil-e-zaar se puchho

sausan se na kuchh nargis-e-bimaar se puchho

taaraaji-e-gulshan kaa sabab khaar se puchho

· · ·

pyaar kaa kaarobaar kartaa huun

sab ko duniyaa mein pyaar kartaa huun

khud pe main e'tibaar kartaa huun

pyaar kartaa thaa pyaar kartaa huun

· · ·