Ghazal

log baiThe rahe raushni ke liye

koi niklaa nahin tirgi ke liye

'umr-bhar ham nibhaate rahe dushmani

vaqt kam paD gayaa dosti ke liye

· · ·

nahin hotaa jahaan kuchh bhi khayaal-e-khaam hotaa hai

use suntaa nahin koi jo qissa 'aam hotaa hai

tumhaari bazm mein jaane se meraa qad nahin baDhtaa

mire aane se mahfil mein tumhaaraa naam hotaa hai

· · ·

vo fazaa kyaa jahaan bahaar na ho

diid hote hi jaan-nisaar na ho

ek bhi gul nazar nahin aataa

jis pe maali kaa e'tibaar na ho

· · ·

zindagi kaa safar 'ajib rahaa

saath mere miraa raqib rahaa

paas manzil thi chhu nahin paayaa

bad se bad-tar miraa nasib rahaa

· · ·

koi kisi kaa hotaa nahin is jahaan mein

kaanTe mile hain ham ko sabhi ki zabaan mein

pahchaante nahin dar-o-divaar in dinon

ban kar kiraaye-daar hain apne makaan mein

· · ·

bahut chhoTaa safar hai zindagi kaa

muqaddar sham' ki hai raushni kaa

sabhi dil toD deinge dekh lenaa

jhamelaa paal rakkhe ho sadi kaa

· · ·

kijiye mat himaaqat ghazal ke liye

lete rahiye nasihat ghazal ke liye

ranjishon se faqat baat banti nahin

hai zaruri mohabbat ghazal ke liye

· · ·

dukhaa de dil jo kisi kaa vo raag mat rakhnaa

jalaa de ghar jo kisi kaa vo aag mat rakhnaa

tumhein hi kar de khaDaa kaTghare mein le jaa kar

kabhi kisi ke liye vo suraagh mat rakhnaa

· · ·

baghaavat karnaa chaahun to kabhi inkaar mat karnaa

sharaarat karnaa chaahun to kabhi inkaar mat karnaa

tumhin se be-sabab har roz mahfil mein tumhaari hi

shikaayat karnaa chaahun to kabhi inkaar mat karnaa

· · ·

do qadam chaltaa nahin koi kisi ke vaaste

vaqt se laDte rahe ham zindagi ke vaaste

saath mil paataa nahin har dam kagaaron kaa unhein

chhoDnaa paDtaa hai lahron ko nadi ke vaaste

· · ·

kaise kartaa un logon kaa maan kabhi main

bhuul nahin paayaa apnaa apmaan kabhi main

jis din har ghar ke chulhe par aag jali ho

dekh nahin paayaa aisaa din maan kabhi main

· · ·

sankaT mein hai jaan tumhaari basti mein

qaatil hai darbaan tumhaari basti mein

ghuT ghuT kar jiinaa paDtaa hai logon ko

marnaa hai aasaan tumhaari basti mein

· · ·

nai kitaab mein paati puraani mat rakhnaa

bichhaDne vaalon ki koi nishaani mat rakhnaa

bhulaa sako to har ik baat tum bhulaa denaa

uDaa de niind jo aisi kahaani mat rakhnaa

· · ·

har khushi ho 'ataa aap ke vaaste

neh barse sadaa aap ke vaaste

hon na kaanTe kabhi raah mein aap ki

bas yahi hai du'aa aap ke vaaste

· · ·

phir na maangungaa kabhi jaam Thahar jaa saaqi

'umr likh dungaa tire naam Thahar jaa saaqi

sirf piine ke liye aataa nahin huun dar pe

aaj karnaa hai bahut kaam Thahar jaa saaqi

· · ·

itne Duub chuke hain yaadon ki khaai mein

bol nahin sakte hain kitni gahraai mein

khush ho jaayaa karte hain man hi man aksar

khud se baatein kar lete hain tanhaai mein

· · ·

pankh phailaate hi banti hain chaman mein surkhiyaan

is liye uDti nahin hain baagh mein ab titliyaan

sirf ik taalaab kaa paani badalne ke liye

be-sabab is mulk mein maari gai hain machhliyaan

· · ·

be-sabab in dinon mujh se naaraaz hai

jaantaa huun main ye us kaa andaaz hai

puchhti hai sabhi se Thikaanaa miraa

us ki divaangi par mujhe naaz hai

· · ·

nikal ke baam pe aao to 'iid ho jaae

hamein bhi jalva dikhaao to 'iid ho jaae

tumhaare baagh mein aane se hoti hai halchal

adhuri pyaas bujhaao to 'iid ho jaae

· · ·