Ghazal

charaagh-e-daagh dil-e-sokhta jo ho raushan

patang phir kahin aankhon ko seinktaa na phire

jo ho tamaancha-e-mauj-e-nasim se aagaah

habaab sar pe liye kaasa-e-riyaa na phire

· · ·

har barhaman bhi diid kaa mushtaaq hai so hai

us but ko paas-e-khaatir-e-ushshaaq hai so hai

mastur sau hijaab mein us kaa hai rukh magar

husn-o-jamaal shohra-e-aafaaq hai so hai

· · ·

fidaa ho jis masihaa-e-zamaan par

dimaagh us kaa ho chauthe aasmaan par

buto aage khudaa ke bhi tumhaaraa

na laaeinge kabhu shikva zabaan par

· · ·

jalva dikhlaati hai vahshat gardish-e-taqdir kaa

shola-e-javvaala halqa hai miri zanjir kaa

kaam maani se nahin surat-parasti ke sivaa

khat-e-rukhsaar-e-butaan khat hai miri taqdir kaa

· · ·

jab se kisi sanam kaa afsaana jaante hain

har sang-o-khisht ko ham but-khaana jaante hain

ai shama-e-husn-o-khubi dil hai vahi hamaaraa

mahfil mein aap jis ko parvaana jaante hain

· · ·

jab se pesh-e-nazar us yaar ki peshaani hai

surat-e-aaina haasil mujhe hairaani hai

khilat-e-baadshahi khilat-e-uryaani hai

sard saamaan miraa be-sard saamaani hai

· · ·

main shahid-e-naaz huun maskan miraa madfan huaa

aaqibat meraa kafan meraa hi pairaahan huaa

martaba yaan past kaa baalaa pas-e-murdan huaa

sang-e-paa aakhir miraa sang-e-sar-e-madfan huaa

· · ·

ham ne apne dil ko pesh-e-ru-e-jaanaan kar diyaa

aaina ko aaina dikhlaa ke hairaan kar diyaa

apni parchhaain se koson bhaagtaa huun in dinon

mujh ko vahshat ne zamaane se gurezaan kar diyaa

· · ·

kyaa kahein tum se shab-e-gham ham pe kyaa kyaa ho gayaa

dil pighal kar bah gayaa paani kalejaa ho gayaa

zikr-e-chashm-e-mast se meraa kharaaba ho gayaa

mai-kade tak bhi nahin pahunchaa ki rusvaa ho gayaa

· · ·

ho gae hain in dinon kuchh aql se maazur ham

hai jo nazdik apne us ko jaante hain duur ham

jis ne taalim-e-anal-haq di tujhe roz-e-alast

hain usi ustaad ke shaagird ai mansur ham

· · ·

phirtaa huun bhaTaktaa koi rahbar nahin miltaa

hai vo nighraa us kaa mujhe ghar nahin miltaa

yaarab maraz-e-ishq hai yaa koi balaa hai

chain is dil-e-betaab ko dam bhar nahin miltaa

· · ·

qadam qadam pe hai andaaz dilrubaai kaa

sitaara auj pe hai un ki zerpaai kaa

nahin hai paas masihaa ke bhi davaa is ki

kisi ko rog khudaayaa na ho judaai kaa

· · ·

khvaahaan-e-mohabbat huun adaavat nahin aati

aataa hai mujhe shukr shikaayat nahin aati

vaan kaam to hote hain khushaamad se baraamad

kyaa fikr karein ham ko samaajat nahin aati

· · ·

dasht mein aavaara ham ko shahr mein rusvaa kiyaa

kyaa kahein tum se suluk is ishq ne kyaa kyaa kiyaa

puchhte kyaa hain dam-e-takbir tu ne kyaa kiyaa

surat-e-aaina chehra aap kaa dekhaa kiyaa

· · ·

maar Daalaa mujhe furqat ne qazaa se pahle

ho gayaa kaam adaa un ki adaa se pahle

sabqat ehsaan ko hai un ke mire isyaan par

afv karte hain khataa ko vo khataa se pahle

· · ·

rashk-e-firdaus chaman hai apnaa

Hyderabad vatan hai apnaa

nisbat-e-gor-o-kafan bejaa hai

gor apni na kafan hai apnaa

· · ·

pesh-e-nazar hai nazaa mein naqsha-nigaar kaa

jalva khizaan dikhaati hai mujh ko bahaar kaa

surme se rutba kam nahin apne ghubaar kaa

hai sang-e-tur sang hamaari mazaar kaa

· · ·