Ghazal

kyunkar na apni jaan bachaaein guphaaon mein

talvaar jaisi kaaT hai bhigi havaaon mein

bas tum hi rah gae ho rivaayat ke paasdaar

itnaa khulus ab kahaan miltaa hai gaanv mein

· · ·

bahut sukun hai qanaa'at ki zindagi se mujhe

qubul kar liyaa jo mil gayaa khushi se mujhe

vo aadmi jise samjhaa thaa main ne abr-e-karam

sulagtaa chhoD gayaa vo bhi khaamushi se mujhe

· · ·

aise har shakhs se naaraaz khudaa rahtaa hai

jo azaan sun ke bhi bistar pe paDaa rahtaa hai

kyaa tumhein us ki 'adaavat kaa pata rahtaa hai

ye jo dariyaa hai samundar se milaa rahtaa hai

· · ·

apnaa nahin aataa hai paraayaa nahin aataa

ghurbat mein koi puchhne vaalaa nahin aataa

paDhnaa nahin aataa jise likhnaa nahin aataa

is shakhs ki qismat mein ujaalaa nahin aataa

· · ·

jab rasm zamaane ki nibhaai gai hogi

tab jaa ke kahin Doli uThaai gai hogi

jaan apni bilaa-vajh ganvaataa nahin koi

sasuraal mein bad-bakht sataai gai hogi

· · ·

musaafirat mein tiraa saath gar nahin hotaa

rah-e-hayaat mein mujh se safar nahin hotaa

gham-e-hayaat shab-e-hijr kis taraf jaate

gharib-khaana hamaaraa agar nahin hotaa

· · ·

vaarison mein ho chukaa jab faisla

marne vaale kaa janaaza tab uThaa

hai koi is se bhi baDh kar saaniha

qatl meraa mere hi ghar mein huaa

· · ·

lag gai kis ki bad-du'aa tum ko

jurm ham ne kiyaa sazaa tum ko

khairiyat jaanne kaa haasil kyaa

kyaa rahaa ham se vaasta tum ko

· · ·

khalaa ki had ko tum to paar karte karte thak gae

rasul-e-paak ek pal mein laa-makaan talak gae

tajalliyon mein aap ki kuchh aisi aab-o-taab thi

nigaar-khaane mein lage sab aaine darak gae

· · ·

puchhti roz hai show-case ki guDiyaa mujh se

aap ke ghar kaa bahal jaaegaa bachcha mujh se

naa-tavaani mein bhi har ghar kaa bharam rakhti huun

kahti rahti hai ye divaar-e-shikasta mujh se

· · ·

mire khulus ne pighlaa diyaa hai patthar ko

ki ab vo haath lagaataa nahin hai khanjar ko

baDaa hi naam kamaayaa bahut mili shohrat

hamaare sar ke jhukaane se aap ke dar ko

· · ·