Ghazal

dard-o-gham kaa aap ko bhi tajraba ho jaaegaa

ziist ki jab talkhiyon se saamnaa ho jaaegaa

chhoD jaa parchhaaiyaan biite hue lamhaat ki

kuchh to jiine kaa mujhe bhi aasraa ho jaaegaa

· · ·

husul-e-zar na kasb-e-rutba-e-zi-shaan pe rakkhi hai

nazar ham ne hamesha khidmat-e-insaan pe rakkhi hai

usi ko har tarah ki kaamraani ho gai haasil

asaas-e-zist jis ne hikmat-e-quraan pe rakkhi hai

· · ·

lahrein kyon saakit-o-khamosh hain sochaa jaae

phir munaasib ho to kankar koi pheinkaa jaae

is qadar jaur uThaae hain khizaan ke haathon

ham se ab mausam-e-gul mein bhi na chahkaa jaae

· · ·

dekh kar hausla mire dil kaa

haath tharraa rahaa hai qaatil kaa

paas aayaa na vaqt-e-gharqaabi

mujh pe ehsaan hai ye saahil kaa

· · ·

raanaai mein Duubi hui paai tiri aavaaz

kyaa khuub khudaa ne hai banaai tiri aavaaz

makhmur hai har taar mire saaz-e-nafas kaa

kaanon mein mire jab se hai aai tiri aavaaz

· · ·

dil ke riste hue zakhmon ko havaa dete hain

mere apne hi miraa dard baDhaa dete hain

log majbur pe ehsaan to karte hain magar

zarb ehsaas ke shishe pe lagaa dete hain

· · ·

bechaargi ke naam kabhi bebasi ke naam

ilzaam sab hi aae miri khaamushi ke naam

har ik qadam pe khaae hain main ne kai fareb

kuchh saadgi ke naam to kuchh dosti ke saath

· · ·

ai vaqt teri aankh kaa kaajal rahe hain ham

har ek masale kaa tire hal rahe hain ham

manzil ki justuju kaa ye aalam to dekhiye

sahraa hai tez dhuup hai aur chal rahe hain ham

· · ·