Ghazal

kabhi khudaa kabhi khud se savaal karte hue

main ji rahaa huun musalsal malaal karte hue

magan thaa kaar-e-mohabbat mein is tarah ki mujhe

khabar na ho saki apnaa ye haal karte hue

· · ·

yahi to dukh hai zamin aasmaan banaa kar bhi

main dar-ba-dar huun khud apnaa jahaan banaa kar bhi

agar ye sach hai ki har shai yahaan pe faani hai

to kyaa karungaa main kuchh jaavedaan banaa kar bhi

· · ·

chale jaaeinge sab asbaab hairaani na jaaegi

kisi surat dil-o-jaan ki ye arzaani na jaaegi

so ab tai hai na jaaeingi ye dil ki vahshatein jab tak

ragon mein is umaDte khuun ki tughyaani na jaaegi

· · ·

ye mohabbat hai ise garmi-e-baazaar na kar

laakh vahshat sahi aisaa to mire yaar na kar

aaj ye soch ki kal kaise sambhaalegaa ise

be-sabab dil mein gumaanon kaa ye ambaar na kar

· · ·

din raat ke dekhe hue manzar se alag hai

ye lamha to maujud o mayassar se alag hai

maujein ki bagule hon mire dil kaa har ik rang

sahraa hai judaa aur samundar se alag hai

· · ·

baDe tufaan uThaane ke liye hain

ye aankhein muskuraane ke liye hain

bil-aakhir kam paDegaa ye andheraa

charaagh itne jalaane ke liye hain

· · ·

jaantaa huun ab yunhi barbaad rakkhegaa mujhe

vo bhi lekin is bahaane yaad rakkhegaa mujhe

khud miri vaaraftagi ne duur use mujh se kiyaa

ye khayaal ab umr bhar naashaad rakkhegaa mujhe

· · ·

kuchh dard jagaae rakhte hain kuchh khvaab sajaae rakhte hain

is dil ke sahaare jivan mein ham baat banaae rakhte hain

aise bhi maraahil aate hain is manzil-e-ishq ki raahon mein

jab ashk bahaate hain khud bhi us ko bhi rulaae rakhte hain

· · ·

khushi se ziist kaa har dukh uThaae jaate hain

ham ahl-e-dil ki rivaayat nibhaae jaate hain

junun ki raah mein bujh bujh ke ab bhi divaane

charaagh shola-e-jaan se jalaae jaate hain

· · ·

zamin bichhaa ke alag aasmaan banaaun koi

zamaan makaan se pare ab jahaan banaaun koi

tamaam umr chale mere saath tanhaai

gharaz hi kyaa hai mujhe kaarvaan banaaun koi

· · ·

tiraa gham dil pe ifshaa kar rahe hain

so dil se kaar-e-duniyaa kar rahe hain

tujhe ab kyaa bataaein ham tire baad

ba-naam-e-zist kyaa kyaa kar rahe hain

· · ·

ik khvaab ko aankhein rehn rakhein ik shauq mein dil viraan kiyaa

jiine ki tamannaa mein ham ne marne kaa sabhi saamaan kiyaa

ham khaak uDaate phirte hain is dasht-e-talab mein phir ik din

iqlim-e-junun us ne bakhshi aur dil kaa hamein sultaan kiyaa

· · ·

main din bhar pahle is duniyaa ki jaulaani mein rahtaa huun

magar phir raat bhar dil ki bayaabaani mein rahtaa huun

yahaan logon ke dil aur chehre har lahza badalte hain

mujhe lagtaa hai main ik dasht-e-imkaani mein rahtaa huun

· · ·

har ghaDi ik sitam ijaad kiyaa hai ham ne

shahr-e-dil khud tujhe barbaad kiyaa hai ham ne

aaj is ke hi karishmon se hain mahjub bahut

kal jise khud hi pari-zaad kiyaa hai ham ne

· · ·

ghubaar-e-raah-e-tilism-e-zamaana ho gae hain

ham aaise log bhi aakhir fasaana ho gae hain

rahe hain raunaq-e-sad-aastaan vo log ki aaj

ye chand tinke jinhein aashiyaana ho gae hain

· · ·

ik naqsh bigaDne se ik had ke guzarne se

kyaa kyaa nahin mar jaataa ik khvaab ke marne se

ab arsa-e-hasti mein sad-rang manaazir hain

is aaina-e-dil mein ik 'aks utarne se

· · ·

saathiyo jo 'ahd baandhaa hai use toDaa na jaae

jism mein jab tak lahu se maa'rka haaraa na jaae

'ahd-e-maazi mein bhi hai koh-e-nidaa jaisaa tilism

ye bhi vo aavaaz hai muD kar jise dekhaa na jaae

· · ·

tiri bazm se jo uTh kar tire jaan-nisaar aae

dil o jaan kaa sab asaasa tire dar pe vaar aae

tiraa ishq ban gayaa hai miri ziist ki masaafat

ki main ab jahaan bhi jaaun tiri rahguzaar aae

· · ·

na aah karte hue aur na vaah karte hue

jiyeinge zabt ko apni panaah karte hue

vo ek rang jo chhalkegaa us ki aankhon se

vo jiit legaa mujhe ik nigaah karte hue

· · ·

jalaa diyaa hai ki is ne bujhaa diyaa hai mujhe

pa dil ki aag ne kandan banaa diyaa hai mujhe

tiri talab ki ataa hai ki jis ne misl-e-charaagh

havaa-e-dahr mein jalnaa sikhaa diyaa hai mujhe

· · ·

mujhe jis ne meraa pataa diyaa vo gham-e-nihaan mire saath hai

miri zindagi miri raushni dil‌-be-amaan mire saath hai

miraa kaarvaan jo bichhaD gayaa mire dil kaa naqsh bigaD gayaa

main huun ik musaafir gum-shuda so yahi fughaan mire saath hai

· · ·