Ghazal

andar to khayaalon ke ho aae khayaal apnaa

ifshaa-e-haqiqat se Dartaa hai savaal apnaa

kaaghaz ki sadaaqat huun go vaqf-e-kitaabat huun

safhon se ibaarat huun khulnaa hai muhaal apnaa

· · ·

umr bhar jis pe takiya rahaa kuchh na thaa dil nahin maantaa

kyaa karun tajzyon kaa aTal faisla dil nahin maantaa

kaund kar ek lamha jo phir jaa milaa vaqt ke abr mein

chhoD degi use vaqt ki maamtaa dil nahin maantaa

· · ·

khirad yaqin ke sukun-zaar ki talaash mein hai

ye dhuup saaya-e-divaar ki talaash mein hai

khataa chaman ki ki hai mubtalaa-e-laala-o-gul

bahaar sirf khas-o-khaar ki talaash mein hai

· · ·

mujh ko talab to nai duniyaa ki hai

raahbari naqsh-e-kaf-e-paa ki hai

baadiya-paimaai-e-vahshat se tang

be-ufaqi vusat-e-sahraa ki hai

· · ·

dilbari us rukh-e-dil-rubaa ki khaal-o-khad se ibaarat nahin hai

mahv-e-nazzaara-e-khaal-o-khad ko ye samajhne ki mohlat nahin hai

dil se hoti to hai raah dil ko faasla hai magar raah khud bhi

ek ho jaaein ham aap mil kar ishq ki aisi qismat nahin hai

· · ·

be-tahi yahi hogi ye jahaan kahin honge

sath kaaTne vaale sath-aafrin honge

aaftaab haT jaae jhilmilaane vaale hi

aasmaan-e-viraan mein raunaq aafrin honge

· · ·

shola-e-shauq ki aaghosh mein kyunkar aauun

ik tamannaa huun ki miT jaaun agar bar aauun

ek daavat huun agar un ke labon par khelun

ek hasrat huun agar khud ko mayassar aauun

· · ·

kaise kaise mile din ko saae hamein

raat ne bhed saare bataae hamein

raaz-e-hasti to kyaa khul sakegaa kabhi

mil gae the magar kuchh kinaae hamein

· · ·

ab yahaan koi nahin pahle yahaan thaa koi

jis ke dam se ye makaan aur makaan thaa koi

daaera daaera thaa jis se vo markaz na rahaa

jab vo thaa nuqta-e-be-qibla kahaan thaa koi

· · ·

khayaal-e-zehn-shikan se zabaan bhar aa jaae

ye ho to haath mire koi sher-e-tar aa jaae

hamaare miTne se duniyaa hui hai aisi nihaan

ki jaise biij se baahar koi shajar aa jaae

· · ·

us ko paa jaaun kabhi aisaa muqaddar hai kahaan

aur uThaa luun us se dil ye zor dil par hai kahaan

ghuT ke rah jaae na sar hi mein kahin zauq-e-sujud

main to sar har dar pe rakh duun par koi dar hai kahaan

· · ·

mahrumiyon kaa ik sabab josh-e-talab khud bhi to hai

shoale pe lapkaa is tarah jaise koi gul hi to hai

kis vahm kis chakkar mein ho khud-bin bagulon dam to lo

siine mein dil ho bhi kahin maanaa ki betaabi to hai

· · ·

saaya jis kaa nazar aataa hai mujhe

vo bhi saaya nazar aataa hai mujhe

vo jo hotaa hi chalaa jaataa hai

kuchh na hogaa nazar aataa hai mujhe

· · ·

apni aag mein bhunti jaae bunti jaae kafan apnaa

goyaa isi liye chhoDaa hai chingaari ne vatan apnaa

jhonke kuchh be-jaan havaa ke aate hain apne-aap chale

jhuum uThte hain chaman ke pankhe us ko jaan ke fan apnaa

· · ·

ik lahr si dekhi gai paae na gae ham

haalaanki yahin the kahin aae na gae ham

girdaab mein kyaa hai jise tufaan miTaae

haan gardish-e-dauraan se miTaae na gae ham

· · ·

jo zakhmon se apne bahalte raheinge

vahi phuul hain shahd ugalte raheinge

ghaTaaein uThin saanp viraaniyon ke

inhi aastinon mein palte raheinge

· · ·

naqqaad apne aap kaa be-laag aisaa kaun hai

honaa miraa ik vahm hai dekhun ye kahtaa kaun hai

vo aaftaab-e-husn hai jalve luTaae jaaegaa

us ko ab is se kyaa gharaz mushtaaq kitnaa kaun hai

· · ·

kuchh na hone ki haqiqat nahin jaani yaani

ham har isbaat pe karte rahe yaani yaani

tah bhi ik sath ki taabir hai sunte the yahi

sath par tairne vaalon ki zabaani yaani

· · ·