Ghazal

ham pe tanhaai mein kuchh aaise bhi lamhe aae

ban gae aap ki tasvir hamaare saae

dard se kuchh ajab ahvaal thaa dil kaa kal raat

jaise rone ki kahin duur se aavaaz aae

· · ·

kaam kuchh aa na saki rasm-e-shanaasaai bhi

shaamil-e-bazm thi shaayad miri tanhaai bhi

kaash tu apni talab mein kabhi pahunche mujh tak

teraa hi aaina hai chashm-e-tamaashaai bhi

· · ·

dahr ko lamha-e-maujud se haT kar dekhein

nai subhein nai shaamein nae manzar dekhein

ghar ki divaaron pe tanhaai ne likkhe hain jo gham

mere gham-khvaar unhein bhi kabhi paDh kar dekhein

· · ·

ye kyaa zarur hamin ko vo aazmaaegaa

har aane vaalaa muqaddar bhi saath laaegaa

kise khabar hai ki is tira-khaak-daan ke liye

hai ek dil hi to raushan so Duub jaaegaa

· · ·

koi dil to nahin hai ki Thahar jaaegaa

vaqt ik khvaab-e-ravaan hai so guzar jaaegaa

har guzarte hue lamhe se yahi khauf rahaa

hasraton se mire daaman ko ye bhar jaaegaa

· · ·

qadam uThe to ajab dil-gudaaz manzar thaa

main aap-apne liye raaste kaa patthar thaa

dil ek aur hazaar aazmaaishein gham ki

diyaa jalaa to thaa lekin havaa ki zad par thaa

· · ·

sitam bhi kartaa hai us kaa sila bhi detaa hai

ki mere haal pe vo muskuraa bhi detaa hai

shanaavaron ko usi ne Dubo diyaa shaayad

jo Dubton ko kinaare lagaa bhi detaa hai

· · ·

naqsh guzre hue lamhon ke hain dil par kyaa kyaa

muD ke dekhun to nazar aate hain manzar kyaa kyaa

kitne chehron pe rahe aks miri hairat ke

mehrbaan mujh pe hue aaina-paikar kyaa kyaa

· · ·

ye koi dil to nahin hai ki Thahar jaaegaa

vaqt ik khvaab-e-ravaan hai so guzar jaaegaa

har guzarte hue lamhe se yahi khauf rahaa

hasraton se mire daaman ko ye bhar jaaegaa

· · ·

guzar gae hain jo din un ko yaad karnaa kyaa

ye zindagi ke liye roz roz marnaa kyaa

miri nazar mein gae mausamon ke rang bhi hain

jo aane vaale hain un mausamon se Darnaa kyaa

· · ·

kyuun khalvat-e-gham mein rahte ho kyuun gosha-nashin bekaar hue

aakhir tumhein sadma kyaa pahunchaa kyaa soch ke khud-aazaar hue

kyuun saaf kushaada raston par tum Thokarein khaate phirte ho

kyuun tira-o-taar si galiyon mein tum aan ke khush-raftaar hue

· · ·

gham hi le de ke miri daulat-e-bedaar nahin

ye khushi bhi hai mayassar koi gham-khvaar nahin

khud se bhi toD chukaa huun main taalluq apnaa

ab miri raah mein haail koi divaar nahin

· · ·

yahi nahin ki vo be-taab-o-be-qaraar gayaa

miri ragon mein jo ik zahr saa utaar gayaa

bujhe hue dar-o-divaar dekhne vaalo

use bhi dekho jo ik umr yaan guzaar gayaa

· · ·

ye kyaa tilism hai main us ko dekh bhi na sakun

ki jis ke jalvon se daamaan-e-chashm bhar jaae

tu mere dil mein misaal-e-chaman mahaktaa hai

main saans luun tiri khushbu bikhar bikhar jaae

· · ·

kabhi paighaam-e-sukun teri nazar ne na diyaa

zindagi chhin li is tarah ki marne na diyaa

thi bahaar-e-gul-e-jalva ki havaa kaa jhonkaa

jis ne daaman nigah-e-shauq kaa bharne na diyaa

· · ·

ai mushfiq-e-man is haal mein tum kis tarah basar farmaaoge

anjaan bane chup baiThoge aur jaan ke dhoke khaaoge

tum apne ghar ke andhere mein kyaa dekhte ho divaaron ko

ye shama ki surat jalnaa kyaa aaegi havaa bujh jaaoge

· · ·

chehra to chamak damak rahaa hai

andar se ye shakhs bujh chukaa hai

thi tab-e-ravaan misaal-e-dariyaa

dariyaa ye magar utar gayaa hai

· · ·

na ab vo khush-nazari hai na khush-khisaali hai

ye kyaa huaa mujhe ye vaza kyuun banaa li hai

ye haal hai mire divaar-o-dar ki vahshat kaa

ki mere hote hue bhi makaan khaali hai

· · ·

kuchh is tarah se teraa gham diye jalaataa thaa

ki khaak-e-dil kaa har ik zarra jagmagaataa thaa

isi liye na kiyaa talkhi-e-jahaan kaa galaa

tiraa khayaal pas-e-parda muskuraataa thaa

· · ·

jaane vaalaa jo kabhi lauT ke aayaa hogaa

ham ne ik umr kaa gham kaise chhupaayaa hogaa

kis tavaqqoa pe koi chaahe vafaaon kaa sila

us ne kuchh soch samajh kar hi bhulaayaa hogaa

· · ·

kyuun khalvat-e-gham mein rahte ho kyuun gosha-nashin bekaar hue

aakhir tumhein sadma kyaa pahunchaa kyaa soch ke khud-aazaar hue

kyuun saaf kushaada raston par tum Thokarein khaate phirte ho

kyuun tira-o-taar si galiyon mein tum un ke khush-raftaar hue

· · ·