Ghazal

kahtaa hai na dil us but-e-be-pir se uljhaa

naaseh miraa dil is tiri taqrir se uljhaa

dil yaar ki jo zulf-e-girah-gir se uljhaa

saudaai thaa achchhaa huaa zanjir se uljhaa

· · ·

yaan hijr mein mahshar dil-e-maail ne dikhaayaa

kaanon se jo sunte the use dil ne dikhaayaa

majnun kaa uThaa parda-e-hasti idhar aur aah

aanchal na use saahib-e-mahmil ne dikhaayaa

· · ·

kab judaa hai mujh se dilbar kab main dilbar se judaa

ho na gauhar aab se aur aab gauhar se judaa

ruuh tan se jaan badan se hosh hai sar se judaa

kyaa kashaakash mein phansaa huun jab se dilbar se judaa

· · ·

jaan lab par aa gai furqat mein bas ghabraa chuke

ab vo aaein yaa na aaein ham to ji se jaa chuke

naaz-o-andaaz-o-adaa ko kaam tum farmaa chuke

khol kar band ab lipaT jaao bahut sharmaa chuke

· · ·

ab to muqaabla hai rukh-o-zulf-e-yaar mein

hai fasl kaa mubaahisa lail-o-nahaar mein

mumkin nahin hai fasl rukh-o-zulf-e-yaar mein

kab infisaal ho sake lail-o-nahaar mein

· · ·

vo bhi kyaa din the judaa hote na the ik dam kahin

gardish-e-aflaak se ab tum kahin aur ham kahin

tham rahein yaa-rab na apne dida-e-pur-nam kahin

kam na ho duniyaa se ab ye chashma-e-zamzam kahin

· · ·

milne ki mujhe yaar se fursat nahin milti

ai marg Thahar jaa abhi rukhsat nahin milti

kuchh pairahan-e-yaar ki nikhat nahin milti

yusuf ki hamein apne bashaarat nahin milti

· · ·