Ghazal

sehr-e-talab na khvaab-e-fusun mujh ko mil gayaa

niind aa gai to khud hi sukun mujh ko mil gayaa

main chaahtaa huun khaak uDaaun jahaan ki

ye kaisi aag kaisaa junun mujh ko mil gayaa

· · ·

kisi ne dekhaa nahin iltijaa ke lahje mein

hazaar phuul khile the duaa ke lahje mein

jo aadmi hai use aadmi milungaa aur

khudaa se baat karungaa khudaa ke lahje mein

· · ·

lafz likhtaa hai ki zanjir banaa detaa hai

vo to hairat ko bhi tahrir banaa detaa hai

tum use sirf nami kah ke ghulu mat barto

ashk ko dard hama-gir banaa detaa hai

· · ·

dasht ke khaas havaale nazar aate hain mujhe

paanv mein khuun ke chhaale nazar aate hain mujhe

haif-sad-haif tujhe dekh nahin paataa main

shukr-sad-shukr ujaale nazar aate hain mujhe

· · ·

huaa na mujh se koi ham-kalaam gardish mein

dhuaan hue hain mire subh-o-shaam gardish mein

khayaal-o-khvaab huaa har zamaana-e-vahshat

utar chuke hain sabhi khush-khiraam gardish mein

· · ·

khaak thi khaak-daan mein kyaa thaa

ham se pahle jahaan mein kyaa thaa

jaan hatheli pe thi patangon ki

jaane is shama-daan mein kyaa thaa

· · ·

khvaahishon se bar-sar-e-paikaar ho jaanaa paDaa

khud hi dil ki raah mein divaar ho jaanaa paDaa

un se puchho rizq ki majburiyaan kyaa chiiz hain

subh hote hi jinhein bedaar ho jaanaa paDaa

· · ·

mere aasaab pe chhaati hi chali jaati hai

koi surat mujhe bhaati hi chali jaati hai

saans dar saans musaafir hain ghubaar-aaluda

zindagi khaak uDaati hi chali jaati hai

· · ·

main rahungaa diye ke saath yahaan

kyaa chaleinge havaa ke haath yahaan

koi aahaT sunaai deti hai

kaun rahtaa hai mere saath yahaan

· · ·

apne aabaa se bahut duur huaa jaataa hai

aadmi ishq mein majbur huaa jaataa hai

is mein kyaa chaand sitaaron ko qabaahat hogi

zarra-e-khaak agar nuur huaa jaataa hai

· · ·

yuun kisi baat se ab Dar nahin lagtaa mujh ko

vahi hotaa hai jo aksar nahin lagtaa mujh ko

phuul lagtaa nahin hargiz tire honTon ki misaal

sarv tujh qad ke baraabar nahin lagtaa mujh ko

· · ·

kisi ne dekhaa nahin iltijaa ke lahje mein

hazaar phuul khile the duaa ke lahje mein

jo aadmi hai use aadmi milungaa main

khudaa se baat karungaa khudaa ke lahje mein

· · ·

lafz tartib se rakhtaa huun main tamsil ke saath

kaun kartaa hai bayaan falsafa tafsil ke saath

ashk paidaa huaa aankhon ki zamin se yak dam

aaina TuuT gayaa hijr ki takmil ke saath

· · ·

ye jo saae sataa rahe the mujhe

kis liye aazmaa rahe the mujhe

khud hi manzar se haT gae ho tum

raaste se haTaa rahe the mujhe

· · ·

dariyaa ki ravaani mire lahje mein nahin hai

main aag huun paani mire lahje mein nahin hai

rakhnaa hai mujhe maan haqiqat kaa jahaan mein

so jhuTi kahaani mire lahje mein nahin hai

· · ·

ye jo ham apni khaanqaah mein hain

is kaa matlab tiri nigaah mein hain

thak chukaa huun main in se mil mil kar

aur kitne darakht raah mein hain

· · ·

davaa asar nahin rakhti duaa qubul nahin

ye kaise log hain jin ko khudaa qubul nahin

miraa bhi dil nahin lagtaa ghane makaanon mein

use bhi shahr ki aab-o-havaa qubul nahin

· · ·

ashk ko raaegaan samajhte ho

tum miraa dukh kahaan samajhte ho

sach bataao phir apne baare mein

gar mujhe raaz-daan samajhte ho

· · ·