Ghazal

aazmaaish ke samundar se guzarnaa bhi to hai

apne khvaabon mein nae rangon ko bharnaa bhi to hai

tum ne jiine ke liye aasaaishein sab kar to liin

tum ye shaayad bhuul baiThe ho ki marnaa bhi to hai

· · ·

na koi khvaahish na koi hasrat na koi ranj-o-malaal mujh ko

rulaa rahaa hai kai dinon se na jaane kis kaa khayaal mujh ko

ye kis ne nindein churaain meri ye kis ne meraa sukun chhinaa

ye kaun hai jo ki kar rahaa hai zaraa zaraa paaemaal mujh ko

· · ·

dil khol kar hansein na to aansu bahaaein log

chikhon ko phir bataao ki kaise dabaaein log

rahnaa paDegaa aise hi taa-zindagi hamein

jo din guzar gae hain unhein bhuul jaaein log

· · ·

ik tamaasha zaat kaa apni banaa kar dekh lo

qissa-e-gham apne logon ko sunaa kar dekh lo

vo dhuaan hogaa ki phir be-maut mar jaaeinge log

ye charaagh-e-ishq hai is ko bujhaa kar dekh lo

· · ·

ye aur baat hai ki sahaaraa nahin bane

lekin kisi ki raah kaa kaanTaa nahin bane

yaaron ke ham ne aib chhupaae hain baarhaa

un ko bachaayaa khud bhi tamaasha nahin bane

· · ·

ye mohabbaton kaa jo rishta hai ye bhi dekhne mein ajiib hai

kahin meraa dushman-e-jaan hai vo to kahin vo meraa habib hai

vo jo jaan se bhi aziiz thaa kahin raaste mein bichhaD gayaa

vo jo nafraton mein shumaar thaa vahi aaj meraa nasib hai

· · ·

shaam ko ghar lauT ke ji bhar ke pachhtaate rahe

kal ke chakkar mein ham apne aaj se jaate rahe

zindagi kaa aur koi pahlu nazar aaya nahin

kuchh nayaa karne ki dhun mein khud ko dohraate rahe

· · ·

ham tumhein badduaa nahin deinge

itni lambi sazaa nahin deinge

gham ko mahsus kijiye saahib

gham to aise maza nahin deinge

· · ·