Ghazal

aisi tan-aasaani se

baaz aa jaa naadaani se

jiinaa mushkil hotaa hai

itni nukta-daani se

· · ·

khushk dariyaaon ko paani de khudaa

baadbaanon ko ravaani de khudaa

be-samaaat kar de saare shahr ko

yaa mujhe phir be-zabaani de khudaa

· · ·

mujhe ab nayaa ik badan chaahiye

aur us ke liye baankpan chaahiye

main ye sochtaa huun asar ke liye

sadaa chaahiye yaa sukhan chaahiye

· · ·

dariyaa jo chaDhaa hai vo utarne nahin denaa

ye lamha-e-maujud guzarne nahin denaa

duniyaa hi nahin dil ko bhi is shahr-e-havas mein

man-maani kisi haal mein karne nahin denaa

· · ·

kaar-e-duniyaa ke taqaazon ko nibhaane mein kaTi

zindagi ret ki divaar uThaane mein kaTi

ab bhi raushan hai tire dil mein mohabbat kaa diyaa

raat phir sham-e-yaqin-saaz jalaane mein kaTi

· · ·

zamin baar-haa badli zamaan nahin badlaa

isi liye to ye meraa jahaan nahin badlaa

na aarzu koi badli na meri mahrumi

badal gayaa hai ravayya samaan nahin badlaa

· · ·

kyaa sune koi zabaani meri

aur phir vo bhi kahaani meri

shahr sahraa ki tarah lagtaa hai

raaegaan naql-e-makaani meri

· · ·

apne baad haqiqat yaa afsaana chhoDaa thaa

phuul khile the main ne jab viraana chhoDaa thaa

saans ghuTi jaati thi kaisaa habs kaa aalam thaa

yaad hai jis din sabze ne lahraanaa chhoDaa thaa

· · ·

nuqsaan kyaa bataaein hamaaraa kiyaa bahut

is kaarobaar-e-dil ne khasaaraa kiyaa bahut

chaaron taraf the phuul shafaq ke khile hue

jis shaam aasmaan kaa nazaaraa kiyaa bahut

· · ·

rang havaa mein phail rahaa hai

dekho kaisaa phuul khilaa hai

mere us ke biich badan hai

aur badan mein dil dariyaa hai

· · ·

kyaa phir zamin dil ki namnaak ho rahi hai

ik bel aarzu ki pechaak ho rahi hai

yalghaar kar rahaa hai ik raushni kaa lashkar

taarikiyon ki chaadar phir chaak ho rahi hai

· · ·

manzar roz badal detaa huun apni narm-khayaali se

shaam shafaq mein Dhal jaati hai rang-e-hinaa ki laali se

tujh se bichhaD kar zinda rahnaa apne sog mein jiinaa hai

dil ik phuul thaa khushbu vaalaa TuuT gayaa hai Daali se

· · ·

agar is shahr ki aab o havaa tabdil ho jaae

to phir sab kuchh ba-juz naam-e-khudaa tabdil ho jaae

mire hone ne duniyaa mein sabhi kuchh to badal Daalaa

mujhe tu hi bataa ab aur kyaa tabdil ho jaae

· · ·

kabhi kabhi ye sunaa-pan khal jaataa hai

bas ik lamha aataa hai Tal jaataa hai

tujh se mujh ko bair sahi par kabhi kabhi

duniyaa teraa jaadu bhi chal jaataa hai

· · ·

main fard-e-jurm teri tayyaar kar rahaa huun

ai aasmaan sun le hushyaar kar rahaa huun

ik had banaa rahaa huun shahr-e-havas mein apni

dar kholne ki khaatir divaar kar rahaa huun

· · ·

main khvaab apne saare nilaam kar rahaa huun

aur ye bhi jaan lo ki be-daam kar rahaa huun

is se gharaz nahin hai boli lagegi kaise

jo kaam karnaa hai bas vo kaam kar rahaa huun

· · ·

ab ye sifat jahaan mein naayaab ho gai hai

malmal badan pe us ke kam-khvaab ho gai hai

koi pata de us ko meri kitaab-e-jaan kaa

duniyaa ke saath vo bhi ik baab ho gai hai

· · ·

duniyaa ko is baar fasaana kar dungaa

khvaabon ko har samt ravaana kar dungaa

in raston se meri puraani nisbat hai

saath chalo to safar suhaanaa kar dungaa

· · ·

dayaar-e-khvaab se aage safar karne kaa din hai

to kyaa ye qissa-e-jaan mukhtasar karne kaa din hai

bulaavaa aa gayaa hai phir mujhe sahraa-navardi kaa

yahi to zindagi ko ham-safar karne kaa din hai

· · ·