Ghazal

ba-rang-e-sher gire aur baar baar gire

hamaare zehn pe kirnon ke aabshaar gire

ghamon ki raah mein saabit-qadam hain divaane

bisaat-e-aish pe kitne nashaat-e-kaar gire

· · ·

muhit misl-e-aasmaan zamin-e-fikr-o-fan pe huun

sukut kaa sabab hai ye maqaam-e-laa-sukhan pe huun

fazaa-e-laa-sabaat mein saraa-e-be-jihaat mein

musaafiraana khanda-rez vaqt ki thakan pe huun

· · ·

savaal-e-subh-e-chaman zulmat-e-khizaan se uThaa

ye nafaa kam to nahin hai jo is ziyaan se uThaa

safina-raani-e-mahtaab dekhtaa koi

ki ik talaatum-e-zau ju-e-kahkashaan se uThaa

· · ·

zer hone na diyaa himmat-e-aali ne mujhe

sar-kashida hi rakhaa sarv-khayaali ne mujhe

itne chehre to na the arzang-e-maani ko nasib

jitne chehre diye aaina-khayaali ne mujhe

· · ·

guunj mire gambhir khayaalon ki mujh se Takraati hai

aankhein band karun yaa kholun bijli kaunde jaati hai

tanhaai ke dasht se guzro to mumkin hai tum bhi suno

sannaaTe ki chikh jo mere kaanon ko pathraati hai

· · ·

fard-e-isyaan ko vo siyaahi de

jis ki vo zulf bhi gavaahi de

be-amaan nim-jaan huun meri jaan

mujh ko aaghosh-e-jaan-panaahi de

· · ·

main bahaaron ke ruup mein gum thaa

jab tujhe mujh se kuchh tabassum thaa

thaa vo apne hi khauf kaa mahkum

jis ki aavaaz mein tahakkum thaa

· · ·

aa jaa andheri raatein tanhaa bitaa chukaa huun

shamein jahaan na jaltin aankhein jalaa chukaa huun

khurshid-e-shaam-e-rafta lauTe to us se puchhun

main zindagi ki kitni subhein ganvaa chukaa huun

· · ·