hujum-e-subh ki tanhaaiyon mein Duub gae — Anwar Moazzam

vo habib ho ki rahbar vo raqib ho ki rahzan
jo dayaar-e-dil se guzre use ham-kalaam kar lo

— Anwar Moazzam

hamein baada-kash-e-dard-e-tamannaa
hamin par band hai mai-khaana dil kaa

— Anwar Moazzam

sab dikhaate hain tiraa aks miri aankhon mein
ham zamaane ko isi taur se mahbub hue

— Anwar Moazzam

kaun royaa pas-e-divaar-e-chaman aakhir-e-shab
kyuun sabaa lauT gai raahguzar se puchho

— Anwar Moazzam

aankhon mein ghul na jaaein kahin zulmaton ke rang
jis samt raushni hai udhar dekhte raho

— Anwar Moazzam

aao dekhein ahl-e-vafaa ki hoti hai tauqir kahaan
kis mahfil kaa naam hai maqtal khinchti hai shamshir kahaan

— Anwar Moazzam

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

jab ki pahlu se yaar uThtaa hai
dard be-ikhtiyaar uThtaa hai

— Mir Taqi Mir

ye aansu ponchh lijiye aur muskuraaiye
chaara nahin hai koi bhi rukhsat kiye baghair

— Nasim Zahid

main ne apni palkon par gham-kade sajaae hain
aarzu ke maatam mein sogvaar hasti hai

— Hanif Fauq

intihaa ke qarib hai duniyaa
aadmi aakhiri sadi kaa huun

— Zubair Khayali

husn jalva dikhaa gayaa apnaa
ishq baiThaa rahaa udaas kahin

— Saifuddin Saif