rahe tazkire amn ke aashti ke — Anwar Shuoor

go mujhe ehsaas-e-tanhaai rahaa shiddat ke saath
kaaT di aadhi sadi ek ajnabi aurat ke saath

zamaane ke jhamelon se mujhe kyaa
miri jaan! main tumhaaraa aadmi huun

divaar-e-zindaan ke pichhe
jurm-e-mohabbat mein baiThaa huun

miri hayaat hai bas raat ke andhere tak
mujhe havaa se bachaae rakho savere tak

kabhi rotaa thaa us ko yaad kar ke
ab aksar be-sabab rone lagaa huun

aadmi ke liye ronaa hai baDi baat 'shuur'
hans to sakte hain sab insaan hansi mein kyaa hai