kuchh lutf is tarah hai musalsal safar ke saath — Arman Khan Arman

kar li hai mohabbat to khataa kyon nahin karte
jab aag lagaa li hai to jal kyon nahin jaate

talkhiyaan khun-e-jigar ki shaa'iri mein ghol kar
chand misre' laaein hain ham bhi sunaane ke liye

nae mizaaj ke logon ko kis liye aakhir
qadim taur-tariqon ke bas mein rahnaa paDaa

jangal mein udaasi ke rahoge bhalaa kab tak
kuchh raah banaa kar ke nikal kyon nahin jaate

nazar to pher mire kaaghazi badan ki taraf
abhi ye zarb-e-musalsal se taar-taar nahin

yak-lakht jal ke khaak mein milne kaa kyaa mazaa
parvaane se kaho ki vo pahle jalaae dil

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

judaai ki ruton mein suratein dhundlaane lagti hain
so aise mausamon mein aaina dekhaa nahin karte

taa-umr tifl-e-dil pe yatimi kaa karb thaa
koshish to ki magar main kabhi maan na ban sakaa

dard ne dil ki parvarish ki hai
dard hi sher se adaa hogaa

aql gum hai dil pareshaan hai nazar betaab hai
justuju se bhi nahin miltaa suraagh-e-zindagi