har ik aansu kaa badlaa ho saktaa hai — Ashwini Yadav

man mein aayaa pahle tum ko taa'ne duun
khair haTaao aur bataao kaise ho

— Ashwini Yadav

duniyaa tire suraagh ko ab paa gayaa huun main
lailaa se laa-ilaah talak aa gayaa huun main

— Ashwini Yadav

mujhe chhoD kar jo chalaa gayaa use yaad karne se kyaa gharaz
jo Thahar gae unhein shukriya jo chale gae unhein alvidaaa’

— Ashwini Yadav

zinda rahte milne vaale laakhon hain
mayyat par har girtaa aansu daulat hai

— Ashwini Yadav

ek 'arse ke baa'd main ne tumhein dekhaa hai
ek 'arse ke baa'd phir se mujhe pyaar huaa

— Ashwini Yadav

tum se bichhaD ke phir koi hasrat nahin bachi
phir tere jaise shakhs se milnaa nahin huaa

— Ashwini Yadav

jab ki pahlu se yaar uThtaa hai
dard be-ikhtiyaar uThtaa hai

— Mir Taqi Mir

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

ye aansu ponchh lijiye aur muskuraaiye
chaara nahin hai koi bhi rukhsat kiye baghair

— Nasim Zahid

main ne apni palkon par gham-kade sajaae hain
aarzu ke maatam mein sogvaar hasti hai

— Hanif Fauq

husn jalva dikhaa gayaa apnaa
ishq baiThaa rahaa udaas kahin

— Saifuddin Saif

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

— Nazeer Akbar Abadi