tum se bichhaD ke phir koi hasrat nahin bachi — Ashwini Yadav

man mein aayaa pahle tum ko taa'ne duun
khair haTaao aur bataao kaise ho

har ik aansu kaa badlaa ho saktaa hai
ye moti angaare bhi ban sakte hain

duniyaa tire suraagh ko ab paa gayaa huun main
lailaa se laa-ilaah talak aa gayaa huun main

mujhe chhoD kar jo chalaa gayaa use yaad karne se kyaa gharaz
jo Thahar gae unhein shukriya jo chale gae unhein alvidaaa’

zinda rahte milne vaale laakhon hain
mayyat par har girtaa aansu daulat hai

ek 'arse ke baa'd main ne tumhein dekhaa hai
ek 'arse ke baa'd phir se mujhe pyaar huaa

bas ek pal ki tamannaa-e-vasl ki khaatir
tamaam 'umr lagaa di gai sanvarne mein

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

aarzu ko ruuh mein gham ban ke rahnaa aa gayaa
sahte sahte ham ko aakhir ranj sahnaa aa gayaa

zindagi pur-kaif banti hai yunhi
kijiye khun-e-tamannaa kijiye

kab tak ai baad-e-sabaa tujh se tavaqqo rakkhun
dil tamannaa kaa shajar hai to haraa ho bhi chukaa

dil ko tire firaaq ki aarzu yaad rah gai
din vo mohabbaton ke bhi misl-e-rah-e-safar gae