aaj nikle yaad ki zambil se — Azhar Adeeb

der lagti hai bahut lauT ke aate aate
aur vo itne mein hamein bhuul chukaa hotaa hai

ham ne ghar ki salaamti ke liye
khud ko ghar se nikaal rakkhaa hai

tu apni marzi ke sabhi kirdaar aazmaa le
mire baghair ab tiri kahaani nahin chalegi

ham un ki aas pe umrein guzaar dete hain
vo moajize jo kabhi runumaa nahin hote

lahje aur aavaaz mein rakkhaa jaataa hai
ab to zahr alfaaz mein rakkhaa jaataa hai

usi ne sab se pahle haar maani
vahi sab se dilaavar lag rahaa thaa

mere khvaabon ke jharokon ko sajaate rahiye
na sahi vasl magar yaad to aate rahiye

ho gae din jinhein bhulaae hue
aaj kal hain vo yaad aae hue

is se baDh kar tiri yaadon ki karun kyaa taazim
teri yaadon mein zamaane ko bhulaa rakkhaa hai

na toDo dil ki hai kaaba kaa Dhaanaa
ye do ghar hain magar buniyaad hai ek

dam liyaa thaa na qayaamat ne hanuz
phir tiraa vaqt-e-safar yaad aayaa

vahin pe TuTne lagtaa hai aitabaar-e-vafaa
jahaan yaqin zyaada dilaae jaate hain