ho gae din jinhein bhulaae hue — Anwar Shuoor

aadmi ke liye ronaa hai baDi baat 'shuur'
hans to sakte hain sab insaan hansi mein kyaa hai

miri hayaat hai bas raat ke andhere tak
mujhe havaa se bachaae rakho savere tak

divaar-e-zindaan ke pichhe
jurm-e-mohabbat mein baiThaa huun

kabhi rotaa thaa us ko yaad kar ke
ab aksar be-sabab rone lagaa huun

go mujhe ehsaas-e-tanhaai rahaa shiddat ke saath
kaaT di aadhi sadi ek ajnabi aurat ke saath

'shuur' sirf iraade se kuchh nahin hotaa
amal hai shart iraade sabhi ke hote hain

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

khud vo karte hain jise ahd-e-vafaa se taabir
sach to ye hai ki vo dhokaa bhi mujhe yaad nahin

yaadon ki rut ke aate hi sab ho gae hare
ham to samajh rahe the sabhi zakhm bhar gae

goyaa tumhaari yaad hi meraa ilaaj hai
hotaa hai pahron zikr tumhaaraa tabib se

yahi hain yaadgaar-e-ghuncha-o-gul is zamaane mein
inhin sukhe hue kaanTon se zikr-e-gulsitaan likhiye