aagahi karb vafaa sabr tamannaa ehsaas — Bashir Farooqi

tazkire mein tire ik naam ko yuun joD diyaa
doston ne mujhe shishe ki tarah toD diyaa

— Bashir Farooqi

pahle ham ne ghar banaa kar faasle paidaa kiye
phir uThaa diin aur divaarein gharon ke darmiyaan

— Bashir Farooqi

ham tere paas aa ke pareshaan hain bahut
ham tujh se duur rahne ko tayyaar bhi nahin

— Bashir Farooqi

chale bhi aao ki ye Dubtaa huaa suraj
charaagh jalne se pahle mujhe bujhaa degaa

— Bashir Farooqi

ajab si aag thi jaltaa rahaa badan saaraa
tamaam umr vo honTon pe ban ke pyaas rahaa

— Bashir Farooqi

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

— Jafar Shirazi

main ne apni palkon par gham-kade sajaae hain
aarzu ke maatam mein sogvaar hasti hai

— Hanif Fauq

us shaan-e-aajizi ke fidaa jis ne 'aarzu'
har naaz har ghurur ke qaabil banaa diyaa

— Arzoo Lakhnavi

bas ek pal ki tamannaa-e-vasl ki khaatir
tamaam 'umr lagaa di gai sanvarne mein

— Wafa Naqvi

hai kahaan tamannaa kaa dusraa qadam yaa-rab
ham ne dasht-e-imkaan ko ek naqsh-e-paa paayaa

— Mirza Ghalib

ik tarz-e-taghaaful hai so vo un ko mubaarak
ik arz-e-tamannaa hai so ham karte raheinge

— Faiz Ahmad Faiz