ham bhi khud ko tabaah kar lete — Behzad Lakhnavi

ai dil ki khalish chal yunhi sahi chaltaa to huun un ki mahfil mein
us vaqt mujhe chaunkaa denaa jab rang pe mahfil aa jaae

vafaaon ke badle jafaa kar rahe hain
main kyaa kar rahaa huun vo kyaa kar rahe hain

aataa hai jo tufaan aane de kashti kaa khudaa khud haafiz hai
mumkin hai ki uThti lahron mein bahtaa huaa saahil aa jaae

main DhunDh rahaa huun miri vo shama kahaan hai
jo bazm ki har chiiz ko parvaana banaa de

go muddatein hui hain kisi se judaa hue
lekin ye dil ki aag abhi tak bujhi nahin

ishq kaa ejaaz sajdon mein nihaan rakhtaa huun main
naqsh-e-paa hoti hai peshaani jahaan rakhtaa huun main