azal se barse hai paakizgi falak se yahaan — Deepak Purohit

khushaamad taabedaari minnat-o-khidmat sujud-e-husn
azal se didani hai bebasi-o-aajizi-e-ishq

— Deepak Purohit

ye kaisi bad-duaa di hai kisi ne
samundar huun magar khaaraa huaa huun

— Deepak Purohit

kahaan jurat in ashkon ki ki dehri aankh ki laanghein
hai pahraa zabt kaa aisaa ki sahme sahme rahte hain

— Deepak Purohit

yuun guftugu-e-ulfat dilchasp ham kareinge
aankhon se tum kahoge aankhon se ham suneinge

— Deepak Purohit

havas-e-zar ne kiyaa rishton kaa jo haal na puchh
khuun rulaataa hai yahaan khuun kaa rishta apnaa

— Deepak Purohit

khub-ru kaun ye aayaa chaman mein aaj ki yaan
sharm se surkh hue jaate hain ye phuul sabhi

— Deepak Purohit

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

ret par ik nishaan hai shaayad
ye hamaaraa makaan hai shaayad

— Muzaffar Abdali

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

— Irfan Sattar

pyaaso raho na dasht mein baarish ke muntazir
maaro zamin pe paanv ki paani nikal paDe

— Iqbal Sajid

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

— Parveen Shakir

ghulaami mein na kaam aati hain shamshirein na tadbirein
jo ho zauq-e-yaqin paidaa to kaT jaati hain zanjirein

— Allama Iqbal