yuun guftugu-e-ulfat dilchasp ham kareinge — Deepak Purohit

ye kaisi bad-duaa di hai kisi ne
samundar huun magar khaaraa huaa huun

azal se barse hai paakizgi falak se yahaan
numaayaan hove hai phir shakl-e-bahan mein vo yahaan

kahaan jurat in ashkon ki ki dehri aankh ki laanghein
hai pahraa zabt kaa aisaa ki sahme sahme rahte hain

havas-e-zar ne kiyaa rishton kaa jo haal na puchh
khuun rulaataa hai yahaan khuun kaa rishta apnaa

thaa kabhi un ki nigaahon mein buland apnaa maqaam
itni unchaai se gir kar bhi koi bachtaa hai

khushaamad taabedaari minnat-o-khidmat sujud-e-husn
azal se didani hai bebasi-o-aajizi-e-ishq

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

aataa rahaa huun yaad main us ko tamaam umr
is zaaviye se ishq mein naakaam kab huaa

yaa husn huaa majbur-e-karam yaa ishq ne manzil paali hai
vo zulf bikhere aae hain ik vahshi ke samjhaane ko

kyaa kahaa ishq jaavedaani hai!
aakhiri baar mil rahi ho kyaa

dil kaun hai ki us se kahein raaz-e-ishq ham
tere khayaal se bhi na ham guftugu karein