guD siin miThaa hai bosa tujh lab kaa — Faez Dehlvi

vahi qadr 'faaez' ki jaane bahut
jise ishq kaa zakhm kaari lage

gul kuun ai shokh mukh tanik dikhlaa
ki khizaan kar dikhaa de us kuun bahaar

jo kahiye us ke haq mein kam hai be-shak
pari hai huur hai ruh-ul-amin hai

tujh badan par jo laal saari hai
aql us ne miri bisaari hai

tujh ko hai ham se judaai aarzu
mere dil mein shauq hai didaar kaa

abr kaa saaya o sabza raah kaa
jaan-e-man rath ki savaari yaad hai