bahut kaDaa thaa vo lamha judaa hue jis pal — Fakhira Batool

naam tumhaaraa haath pe likhnaa yaad rahaa
ham us ko taqdir banaanaa bhuul gae

aap ki jaanib se aae to uThaa kar rakh liye
pattharon se ghar sajaane kaa kabhi sochaa na thaa

us se bichhaD ke dil kaa huaa hai ajiib haal
paane ki aarzu gai khone kaa Dar gayaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kyon tasavvur mein ji rahaa huun main
jab haqiqat mein mar hi jaanaa hai

jism-e-aazaadi mein phunki tu ne majburi ki ruuh
khair jo chaahaa kiyaa ab ye bataa ham kyaa karein

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

umr bhar kaun nibhaataa hai ta'alluq itnaa
ai miri jaan ke dushman tujhe allaah rakkhe