badan phir se ugaa legi ye miTTi — Farhat Ehsas

ek bose ke bhi nasib na hon
honTh itne bhi ab gharib na hon

kaarkhaana hai usi husn kaa aalam saaraa
bas jidhar us ne lagaayaa hai udhar lag gae hain

kisi haalat mein bhi tanhaa nahin hone deti
hai yahi ek kharaabi miri tanhaai ki

hamaaraa zinda rahnaa aur marnaa ek jaisaa hai
ham apne yaum-e-paidaaish ko bhi barsi samajhte hain

'ehsaas' ne buton mein khudaa ko kiyaa sharik
is shirk ke baghair to imaan hi nahin

vo chaand kah ke gayaa thaa ki aaj niklegaa
to intizaar mein baiThaa huaa huun shaam se main