use har haal mein yakjaa karungaa — Gulshan Mehra

jise bhi chaahiye baa-shauq rakh le
ye ik patthar jo mujh mein dil-numaa hai

mujhe tum kyaa bataaoge hadon se paar kyaa kyaa hai
jahaan tum jaa rahe ho naa vahaan se lauT aayaa main

tire bimaar kaa guldaston se chehra nahin khiltaa
mujhe apni koi hansti hui tasvir bhejaa kar

main apne aap se ik shart haaraa huun bataaun kyaa
mujhe lagtaa thaa meraa dil kabhi patthar nahin hogaa

ye dard jo tum ko hai diyaa tum se milaa thaa
ham ne koi saamaan tumhaaraa nahin rakkhaa

faqat kahne ki baatein hain kise kis kaa sahaaraa hai
tumhaaraa gham tumhaaraa hai hamaaraa gham hamaaraa hai