aaein pasand kyaa use duniyaa ki raahatein — Jagat Mohan Lal Ravan

pesh to hogaa adaalat mein muqadmaa be-shak
jurm qaatil hi ke sar ho ye zaruri to nahin

saamne taarif ghibat mein gila
aap ke dil ki safaai dekh li

abhi tak fasl-e-gul mein ik sadaa-e-dard aati hai
vahaan ki khaak se pahle jahaan thaa aashiyaan meraa

kuchh iztiraab-e-ishq kaa aalam na puchhiye
bijli taDap rahi thi ki jaan is badan mein thi

vo baada-nosh haqiqat hai is jahaan mein 'ravaan'
ki jhuum jaae falak gar use khumaar aae

vo khush ho ke mujh se khafaa ho gayaa
mujhe kyaa umidein thiin kyaa ho gayaa