shokhi shabaab husn tabassum hayaa ke saath — Kunwar Mahendra Singh Bedi Sahar

gham-e-sud-o-ziyaan se be-niyaazaana nikaltaa hai
baDi farzaangi se teraa divaana nikaltaa hai

pareshaan the tiri mahfil se baahar
pashemaan hain tiri mahfil mein aa kar

ham un ke sitam ko bhi karam jaan rahe hain
aur vo hain ki is par bhi buraa maan rahe hain

in shokh hasinon ki niraali hai adaa bhi
but ho ke samajhte hain ki jaise hain khudaa bhi

kisi ik-aadh mai-kash se khataa kuchh ho gai hogi
magar kyuun mai-kade kaa mai-kada bad-naam hai saaqi

abhi vo kamsin ubhar rahaa hai abhi hai us par shabaab aadhaa
abhi jigar mein khalish hai aadhi abhi hai mujh par itaab aadhaa

main baDaa ho gayaa huun magar bachpanaa
mere dil se kabhi bhi gayaa hi nahin

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

thak gayaa hai dil-e-vahshi miraa fariyaad se bhi
ji bahaltaa nahin ai dost tiri yaad se bhi

na ho ehsaas to saaraa jahaan hai be-his-o-murda
gudaaz-e-dil ho to dukhti ragein milti hain patthar mein

'saif' andaaz-e-bayaan rang badal detaa hai
varna duniyaa mein koi baat nai baat nahin

barsaat kaa baadal to divaana hai kyaa jaane
kis raah se bachnaa hai kis chhat ko bhigonaa hai